Nyuma yo kurakazwa n’amakuru avuga ko Abanyakenya baba mu bindi bihugu batemerewe gutora, hari abatangiye gushaka abunganizi mu nkiko ngo baburane uburenganzira bwabo.

Inkuru y’ikinyamakuru Standard Digital cyo muri Kenya, ivuga ko bamwe mu bayobozi muri Kenya na komisiyo y’amatora batangaje ko ubukungu n’ibikoresho bidahagije mu kubarura Abanyakenya baba hanze, bidashobora gutuma Abanyakenya baba hanze y’igihugu batora.

Abayobozi bavuga ko gutora kw’ababa hanze y’igihugu bishobora kuzakunda mu mwaka wa 2017. Minisitiri w’ubutabera muri Kenya Eugene Wamalwa, yabwiye inteko ishinga amategeko ko inama y’abaminisitiri yemeje ko hari ubushobozi buke ku buryo Abanyakenya baba hanze y’igihugu bazitabira amatora mu mwaka wa 2017.

Ubu burakari bw’abanyakenya baba mu bindi bihugu buje nyuma y’uko leta itangarije kuri uyu wa kabiri ko nta bushobozi ifite bwo kubarura Abanyakenya baba hanze ngo bitabire amatora.

Aya magambo ya leta, ubu hari gucicikana ubutumwa bugaragaza ko abantu batishimiye iki cyemezo, ndetse abasesengura bakavuga ko bishobora kubyutsa imyivumbagatanyo mu moko yo muri iki gihugu ahora ahanganye.