Abarimu ba kaminuza muri Kenya bashobora kujya mu myigaragambyo muri Nzeri uyu mwaka, nyuma y’uko ibiganiro ku mishahara yabo kuwa Gatatu tariki 8 Kanama, bitagize icyo bigeraho.

Ikinyamakuru The Daily Nation dukesha iyi nkuru, gitangaza ko abagize ihuriro ry’abakora mu biro bishinzwe amasomo muri za kaminuza bavuze ko Ministeri ishinzwe amashuri makuru na za kaminuza itigeze yitabira ibiganiro byari byateganijwe.

Aba barimu banenga imyitwarire y’abayobozi ba za kaminuza, bakananenga uburyo uburyo bakomeje kubangamira amasezerano bumvikanye ho ’

Inama yari iteganijwe yari iyo kureba impamvu amasezerano atashyizwe mu bikorwa, ayo masezerano yemejwe muri 2010 yagombaga gushyirwa mu bikorwa mu mwaka w’imari ushize wa 2011.

Amasezerano yavugaga ko umwarimu wo ku rwego rwa ’’professor ’’, umushahara we uzuva ku mashilingi 165,000 ukaba amashilingi 400,000, hakiyongeraho amafaranga y’inzu yagombaga kuva ku Mashirimgi 64,000 akagera kuri 95,000.

Abarimu bo ku rwego rwa ’’associate professor’’, umushahara wabo wagombaga kuva ku Mashiringi 135,000 ukagera kuri 298,000.

Umwarimu wo ku rwego rwa ’’Senior lecturer’’, umushahara we wagombaga kugera kuri ku Mashiringi 221,000 n’inzu ya 75,000; umushahara w’umwarimu wo ku rwego rwa ’’lecturer’’ wagombaga kugera Ku Mashiringi 165,000 n’inzu ya 70,000, naho ’’Assistant lecturer ’’agafata Amashiringi 121,000 n’inzu ya 55,000.