Nyuma y’iminsi ibiri y’imirwano ikomeye hagati y’abashyigikiye n’abadashyigikiye Perezida wa Misiri Mohamed Morsi, kuwa Kane, tariki ya 6 Ukuboza 2012, Perezida Morsi abinyujije kuri Televisiyo y’Igihugu yagejeje ijambo ku baturage b’igihugu cye.

Mu ijambo rye yasabye ko habaho ibiganiro hagati y’impande zombi, ariko atsimbarara ku gikorwa cy’itora ry’Itegeko Nshinga.

Amakuru dukesha Radio Mpuzamahanga y’Abafaransa RFI, avuga ko mu ijambo rye, Perezida Morsi, atiyigeze agira igisubizo na kimwe atanga ku bisabwa n’uruhande rw’abatavuga rumwe n’ubutegetsi bwe. Gusa yasabye ko kuwa Gatandatu nyuma ya saa sita aribwo ko habaho ibiganiro.

Hagati aho abatavuga rumwe n’ubutegetsi bwa Morsi, bavuga ko hadashobora kubaho ibiganiro mu gihe hatarabanza guhindurwa ingingo zimwe na zimwe ziri mu Itegeko Nshinga ziha ububasha buhanitse Perezida wa Misiri ibyo we adakozwa. Biteganijwe ko amatora y’Itegeko Nshinga azaba kuya 15 Ukuboza 2012.

Mu mirwano iherutse kuba hagati y’abashyigikiye Perezida Morsi n’abatamushyigikiye, bivugwa ko hapfuye abantu batanu, benshi barakomereka naho abandi babura irengero. Imirwano ibera mu nkengero ry’icumbi rya Morsi aho inzego z’umutekano zitarabasha guhagarika ubwo bushyamirane.