Kuri uyu wa Kane ni umunsi wa kabiri abacuruzi bo mu Mujyi wa Kampala bafunze imiryango y’amaduka bakerekeza mu biganiro na Perezida Museveni.

Aba bacuruzi bafashe icyemezo cyo gufunga amaduka yabo kuva kuwa Gatatu w’iki cyumweru tariki 11 Mutarama 2012 nk’imwe mu nzira yo kwigaragambiriza ubwiyongere bw’inyungu ku nguzanyo bari baratse amabanki nyamara bitari biri mu masezerano bagiranye na za banki mbere y’uko zibaha inguzanyo.

Mu kwigaragambya, abacuruzi basaba Guverinoma ko yakwita ku kibazo cyabo kugira ngo bashobore gukomeza gucuruza.

Mu gushaka gukemura iki kibazo, uyu munsi abacuruzi barahura n’abacungamari baza banki zabagurije, umuyobozi mukuru wa Banki nkuru ya Uganda Emmanuel Mutebile, Minisitiri w’ubucuruzi n’inganda ndetse na Minisitiri w’Imari muri Amelia Kyambadde.

Mu nama yabaye ku munsi wa mbere w’iyi myigaragambyo, abacuruzi bahuriye mu ngoro y’umukuru w’igihugu iri Nakasero, aho Perezida Museveni yihanangirije abayobozi b’ishyirahamwe ryabo KACITA (Kampala City Traders Association) kutongera gukoresha inzira y’imyigaragambyo ikaze kuko ibyo ntacyo byongera mu ikemurwa ry’ikibazo.

Perezida Museveni yagize ati”Iyo myigaragambyo no gutera urujijo si byiza ku bukungu bw’igihugu, nta mpamvu ihari yo gutuma mukora imyigaragambyo, dushobora kuganira kuri icyo kibazo mu mutuzo. Iki ni igihugu cyanyu kandi n’ubwo bucuruzi ni ubwanyu, imyigaragambyo rero nta na kimwe yacyemura”.

Itsinda rigirana ibiganiro na Perezida Museveni riyobowe na Godfrey Kirumira uhagarariye aba bacuruzi, akaba yarabwiye Museveni ko bategereje cyane ibizava muri izi nama.