Leta ya Cameroun yatangaje ko yahaye ubuhungiro ku buryo bw’agateganyo umukuru w’igihugu cya Centrafrique, Francois Bozize, umuryango we ukaba werekeje muri Congo Kinshasa.

Leta ya Cameroun yatangaje ko yahaye ubuhungiro umukuru w’igihugu cya Centrafrique, nyuma y’aho abarwanya ubutegetsi bafatiye umurwa mukuru Bangui ku cyumweru tariki ya 24 Werurwe 2013.

Amakuru atangazwa n’Ibiro Ntaramakuru by’Abafaransa, aravuguruza amakuru yavugaga ko Perezida wa Centrafrique, ari muri Congo Kinshasa, ko ahubwo umuryango we ugizwe n’abantu bagera kuri 20, barimo n’umuhungu we, ari bo bageze muri icyo gihugu.

Umuryango w’Ubumwe bwa Afrika wamagannye iryo hirikwa ry’ubutegetsi, akaba wakuye iki gihugu mu banyamuryango bawo.

Umukuru w’igihugu cya Afurika y’Epfo, Jacob Zuma, yavuze ko abasirikari b’icyo gihugu bagera kuri 13 bishwe, abandi bagera kuri 30 bagakomereka, igihe bageragezaga kubuza abarwanyi guhirika ubutegetsi.

Afurika y’Epfo yari yohereje amagana y’abasirikare gufasha umukuru w’igihugu cya Centrafrique Francois Bozize, kurwanya abigometse ku butegetsi.

Abahiritse ubutegetsi bakaba bavuze ko bagumishaho ubutegetsi buhuriwe ho n’impande zombi, nk’uko byumvikanweho mu mugambi w’amahoro washyizweho umukono muri Mutarama 2013, ukaba kandi warashyigikiwe na Perezida Bozize.