Mu gace ka Afgoye ho muri Somalia, imodoka yari itwaye abayobozi b’inzibacyuho harimo na Perezida Sharif Sheikh Ahmed baguye mu gaco k’abarwanyi ba Al Shabab mu birometero 30 uvuye muri Mogadishu.

Amakuru dukesha Allafrica.com avuga ko ibi byabaye kuri uyu wa mbere ubwo perezida Sharif yari yasuye Afgoye, agace kamaze iminsi kagiye mu maboko y’ingabo za Afurica Yunze Ubumwe. Abarwanyi ba Al Shabab bahise batega imodoka yari itwaye Perezida mu rusisiro rwa Alamada.

N’ubwo Ibiro Ntaramakuru by’Abongereza Reuters byavuze ko nta wakomerekeye muri iyi mirwano yamaze iminota 30, andi makuru yo avuga ko barindwi mu barinda Perezida bakomeretse, ndetse umwe agapfira muri iyi mirwano.

Ingabo za Leta zavuze ko abaminisitiri n’abandi bayobozi bose bari baherekeje Perezida ntawigeze ahakomerekera, ndetse banatangaza ko abarwanyi ba Al-shabab bagera kuri bane bafashwe mpiri. N’umuvugizi wa AMISOM, Patty Ankunda yavuze ko imirwano yarangiye neza, ndetse na Perezida Sharif ameze neza ariko nabo ntiyavuze niba hari abakomerekeye muri iyi mirwano.

Ibi byateye abantu kwibaza niba AMISOM n’izindi ngabo zishinzwe kubungabunga amahoro muri Somalia zarafashe aka gace. Ku wa Gatanu ushize ingabo za Afurika zishinzwe kubungabunga amahoro muri Somalia zari zafashe agace ka Afugoye, nyamara biragaragara ko Al-Shabaab igihari.