Kuri uyu wa Gatandatu tariki 4 Kanama 2012 i Kilambo mu Karere ka Walikare hubuye imirwano hagati y’umutwe wa Mai-Mai Raia Mutomboki n’uwa Akilimari, hapfamo umuturage umwe inzu nyinshi zihabwa inkongi y’umuriro, bituma abaturage benshi bavanywa mu byabo.

Nk’uko ababibonye babivuga , abarwanyi ba Raia Mutomboki nibo bagabye igitero, nyuma yo gutwika amazu bahise bahava.

Amakuru dukesha Radio Okapi avuga ko Mushungania Benjamin, umukozi w’umwe mu muryango utegamiye kuri Leta uharanira uburenganzira bw’ikiremwamuntu ukorerai i Walikare, avuga ko bakomeje kwotsa igitutu Leta ya Kinshasa kugira ngo ihoshe imirwano ikimeje kworeka imbaga y’abaturage.

Avuga ko ubu bigoye kugira imirimo ikorwa muri ako gace kuko kigaruriwe n’imitwe myinshi y’itwaje intwaro.

Avuga kandi ko abategetsi ba Congo bashyira ingufu nyinshi zo kurwanya Umutwe wa M23, nyamara abaturage ba Walikare bakomeje gutikizwa n’indi mitwe y’itwaje intwaro.

Muri ako gace imitwe yitwaje intwaro gakondo ikomeje guhangana na FDRL mu rwego rwo kurengera abaturage bayo.