Agace ka Nyamilima gaherereye ku bilometero 200 by’amajyaruguru y’uburengerazuba bwa Goma, ku cyumweru tariki ya 17 Gashyantare 2013 kigaruriwe n’umutwe wa Mai Mai Shetani bivugwa ko ukorana na leta.

Uyu mujyi wigaruriwe nyuma y’imirwano ikomeye yawuhuje n’umutwe wa Mai Mai Nyatura ushyigikiwe n’abarwanyi b’umutwe wa M23, nk’uko BBC ibitangaza.

Nubwo nta mibare idafite aho ibogamiye iratangazwa, umuyobozi wungirije akaba n’umuvugizi wa sosiyete sivile muri aka gace Omar Kobata avuga ko hapfuye abantu 15 ku ruhande rwa Nyatura hakanakomereka umwe ku ruhande rwa Mai Mai Shetani.

Kobata akomeza avuga ko iyi mitwe yombi imaze igihe kigera ku kwezi ishyamiraniye muri aka gace, nyamara ngo leta ntacyo ikora ngo iyi mirwano hagarare.