Kuri uyu wa Gatanu, abarwanyi ba Al-Shabab bo mu gihugu cya Somalia bateze imodoka zari zitwaye abakozi bafasha impunzi mu nkambi ya Dadaab, bica Umunyakenya umwe banashimuta abandi bane hafi y’umupaka wa Kenya na Somalia.

Nkuko tubikesha Televisiyo ya Aljazeera, ivuga ko abo bakozi bakoreraga umuryango w’abagiraneza w’Abanyanorvège ufasha impunzi.

Philip Ndolo uhagarariye Polisi muri kariya gace, yatangarije Ibiro Ntaramakuru by’Abongereza “Reuters” ko abantu bitwaje intwaro bateye imodoka ebyiri zari zitwaye abo bakozi hafi y’iyi nkambi ya Dadaab bahita barasa umushoferi.

Akomeza avuga ko abo bantu bafite ubwenegihugu bwa Norvège, Canada, Pakistan ndetse na Philippines.

Ndoli avuga ko nubwo mbere ibinyamakuru byavugaga ko uyu mushoferi yashimushwe ,ariko byagaragaye nyuma ko we yahise yicwa bariya bandi bane bakaba aribo bahise bashimutwa n’abo barwanyi ba Al-Shabab.

Iyi nkambi ya Dadaab icumbikiye impunzi z’Abanyasomaliya zisaga ibihumbi magana atanu zahunze ibibazo by’izuba ryatse muri kiriya gihugu, ndetse n’intambara ikomeje kuyogoza iki gihugu guhera mu mwaka w’1991.