Abantu bitwaje intwaro bishe barashe umunyamakuru w’Umunyasomalia, Ahmed Farah Ilyas, wakoraga kuri televiziyo y’Igihugu.

Ishyirahamwe ry’Abanyamakuru muri Somalia, ryatangaje ko Ahmed Farah Ilyas, yishwe arashwe, mu ntangiriro z’iki cyumweru, mu gace ka Las Anod, gaherereye mu Ntara ya Sool.

Nk’uko Radiyo Ijwi rya Amerika yabitangaje, iyicwa rya Ahmed rije nyuma y’uko mu minsi mike ishize undi munyamakuru wa Shabelle Media Network, Mohamed Mohamud yarusimbutse mu murwa mukuru wa Somalia.

Ishirahamwe ry’abanyamakuru muri Somalia, ryemeza ko ubwo bwicanyi ari umugambi wo kuniga itangaza makuru, rikaba risaba Leta ya Somalia kugira icyo ibikoraho, kuko kugeza ubu nta bantu baratabwa muri yombi kubera ibyo bikorwa bibi bikomeje kwibasira Abanyamakuru.

Ahmed Farah Ilyas abaye umunyamakuru wa cumi n’umunani wishwe, muri uyu mwaka wa 2012 muri Somalia.
Somalia ni kimwe mu bihugu Abanyamakuru bibasirwa kurusha ahandi ku isi.