Igihugu cya Somalia cyashegeshwe n’intambara, abanyamakuru bahakorera bakomeje kwibasirwa, mu mujyi wa Mogadishu ku itariki ya 21 nzeri 2012, abanyamakuru 4 biciwe umunsi umwe.

Umuryango w’ubumwe bw’abanyamakuru watangarije Voanews.com ko utazi neza uwihishe inyuma y’iyicwa ry’aba banyamakuru.

Mohamed Ibrahim, Umunyamabanga w’uwo muryango yagize ati “icyo tuzi neza ni uko bicirwa mu gace kagenzurwa n’ingabo za Leta”.

Akomeza avuga ko muri Somaliya hari imitwe myinshi y’iterabwoba nka Al Shabab yakunze guhitana abanyamakuru benshi. Bityo ntibazi neza niba ari yo ikomeje kubigiramo uruhare.

Urupfu rw’aba banyamakuru 4 ruje nyuma y’igihe kitarenze amasaha 24 hishwe abandi 3 muri 15 bahitanywe n’igisasu cyatewe muri resitora mu murwa mukuru wa Somalia.

Muri iki gihugu, abanyamakuru benshi bari barahunze, bari batangiye kugaruka mu gihugu nyuma y’aho habonekeye agahenge kabonetse mu mezi 5.

Kuva uyu mwaka watangira hamaze kwicwa abanyamakuru abagera kuri 13.