Abagize inzego zishinzwe gucunga umutekano mu midugudu igize Akarere ka Gasabo bashyize mu majwi Local Defense mu bikorwa byo kunywa no gukingira ikibaba abakoresha ibiyobyabwenge.

Ibi byagaragajwe mu nama abagize inzego za Community Policing mu Karere ka Gasabo bagiranye na Polisi y’igihugu kuwa Gatandatu ku itariki ya 5 Ukwakira 2012.

Nk’uko byagaragajwe n’abagize za Community Policing mu midugudu yose igize Gasabo, Local Defense ngo ziri mu banywi b’ibiyobyabwenge bakaba bagira uruhare mu guhishira ababinywa.

Bamwe mu bashinzwe gucunga umutekano mu midugudu bavuze ko Local Defense iba izi neza aho ibikorwa byo gucuruza ibiyobyabwenge bikorerwa, nyamara bakabyirengagiza.

Abagize Community Policing bitabiriye inama bavuze ko hari n’igihe Local Defense zerekwa aho ibiyobyabwenge biri nyamara bakamera nk’aho batabibonye.

Kanamugire Muhamed ushinzwe ibikorwa by’umutekano muri Kabuga ya mbere yagaragaje ko guhishirwa kw’ibiyobyambwenge bibaho.

Kanamugire asaba ko byaba byiza Community Policing zishakiwe imyambaro n’amakarita kugira ngo zo zigaragaze ubunyangamugayo bwazo. Ati “nihakorwe ibishoboka byose hashakwe umwambaro uturanga, maze ducunge umutekano dufashe Polisi gucunga umutekano.

Ku kibazo cya ba Local Defense batungwa agatoki ko baba bahishira ikoreshwa ry’ibiyobyabwenge, Umuvugizi wa Polisi y’u Rwanda, Sup Theos Badege, yatangarije IGIHE ko ubu gucunga umutekano bireba cyane inzego za Community Policing bishobotse zakongererwa ubushobozi kuburyo ari bo bakurikirana ibibera hirya no hino aho abantu batuye.

Badege yatangaje ko bitoroshye ko Abapolisi ubwabo bakwifasha gucunga umutekano ati “kugeza ubu umupolisi umwe mu Rwanda abarirwa ko acunga umutekano w’abantu bagera ku 1000. Ntabwo byoroshye icyo Polisi n’Abanyarwanda tugomba gukora ni uguhugura abagize Community Policing bakaba bakunganira Polisi gucunga umutekano nibwo buryo bushoboka”.

Umuvugizi wa Polisi y'u Rwanda yakira ibibazo

Nk’uko Badege yakomeje abitangaza, abantu bibumbiye muri Community Policing bategerejweho byinshi no kubungabunga umutekano mu baturage nibaramuka bakoranye na Polisi uko bikwiye.

Sup Badege akaba yatanze inimero zazajya zifashishwa n’abaturage kugira ngo batabarwe.

Akarere ka Gasabo kakaba gafite abagize Community Policing barenga 1300 naho mu gihugu cyose hakaba hari abagize Community Policing bagera ku 75.000.