Imyitozo ya gisirikare yiswe “Ushirikiano Imara 2012” yahuzaga abasirikare bo mu bihugu bigize Umuryango wa Afurika y’Iburasirazuba (EAC), yashojwe ku mugaragaro tariki ya 26 Ukwakira 2012, ikaba yararangiye igeze ku ntego zayo ndetse n’ibikorwa bifasha abatuye hafi y’ahaberaga iyi myitozo.

Maj Gen. Jacques Musemakweli wari ukuriye iyi myitozo ya “Ushirikiano Imara 2012”, mu ijambo yagejeje ku bari bitabiriye isozwa ry’iyi myitozo ya 2012 yibukije impamvu nyamukuru y’imyitozo yahuje ingabo, abapolisi n’abasivili bo mu bihugu bigize Afurika y’Iburasirazuba.

Yavuze ko yari igamije kubaka ubumwe n’ububasha bw’ingabo z’ibi bihugu mu kurinda amahoro, kurwanya iterabwoba, ibiza na ba rushimusi muri Afurika y’Iburasirazuba ndetse no hanze y’uyu muryango.

Yatangaje ko imyitozo yagenze neza, avuga ko abasirikare bakoze n’ibikorwa bifasha abaturage aho bavuye abaturage ibihumbi 3927 ku ndwara zitandukanye, bagatera ibiti 4500, bakanubaka ibyumba by’amashuri bitatu ku Rwunge rw’Amashuri rwa Dihiro.

Minisitiri w’Ingabo General James Kabarebe washoje iyi myitozo yashimiye ibihugu byagize uruhare muri iki gikorwa cyo gutoreza hamwe ingabo za Afurika y’Iburasirazuba, n’abagize uruhare bose mu gikorwa.

Yavuze ko imyitozo yahaye ingabo z’umuryango wa EAC ubushobozi bwo kurengera abaturage bo mu bihugu baturukamo, anavuga ko iki gikorwa cyongerereye agaciro ingabo zo muri Afurika y’Iburasirazuba.

General Kabarebe yanongeyeho ko kuba ingabo za Afurika y’Iburasirazuba zibasha gukorera hamwe bigaragaza ko ihuzwa ry’imiyoborere na ryo rishobora kugerwaho.

Iyi myitozo ya Gisirikare yahuzaga ingabo z’ibihugu bitanu bigize Afurika y’Iburasirazuba yasojwe imaze ibyumweru bigera kuri bibiri. Yaberaga mu Ishuri rya Gisirikare rya Gako mu Karere ka Bugesera, ikanabera no mu kiyaga cya Kivu ku basirikare barwanira mu mazi.

Mu muhango wo gusoza iyi myitozo hanibutswe umusirikare wo muri Tanzaniya waguye muri iyi myitozo, akaba yarazize indwara y’umutima.