Nk’uko bisanzwe mu muco w’Abanyarwanda guhura no kuganira hakabaho gusangira ibitekerezo no kungurana inama, ndetse ahakenewe umuti ukavugutirwa bose ku gipimo gikwiye kandi cy’ingirakamaro, abana bato bo "mizero y’ahazaza h’igihugu” ntibibagiranye. Ni muri urwo rwego ku nshuro ya karindwi Inama y’igihugu y’abana igiye guterana muri uku kwezi kwa Mutarama 2012.

Inama y’Igihugu y’Abana yuzuzanya n’izindi nama zinyuranye zibaho ku rwego rw’igihugu, kandi buri gihe iba ikurikiranye n’Inama y’Igihugu y’Umushyikirano. Umwihariko w’inama y’igihugu y’abana ni uko yo yibanda ku bibazo byabo bwite ifatiye ku myumvire, ubumenyi n’ibitekerezo biri ku rwego rwabo, bakaganira mu buryo bisangamo kandi bumvikanamo.

Inama y’Igihugu y’Abana iteganyijwe kuwa 04 Mutarama 2012, ni iya karindwi kuva iya mbere yaterana mu mwaka w’2004. Ni inama abana batorezwamo kuganira bashize amanga, bagatanga ibitekerezo bibavuye ibwonko, kandi bakabikora mu bwisanzure, umutuzo n’ubusabane buranga abonse rimwe. Ni inama kandi ibaha urubuga rwo kumenya kwishakamo ibisubizo ku byo bashoboye, bakahigira gufata ibyemezo by’ibibareba, bakanahabonera amahirwe yo gutegwa amatwi n’inzego zibashinzwe. Ibi bikaba mu buryo bwihuse kurenza ubundi bwose bushobora kubaho, kuko izindi nzira zose zanyuzwamo ubutumwa ngo buzagere ku nzego zo hejuru zibashinzwe zatinda kandi n’ibisubizo bigatinda kubagarukira. Mu nama y’Igihugu y’abana hari ibifatirwa umwanzuro unyarutse, n’ibyo udafatirwaho ntibitinda gushyirwa mu murongo.

Inama y’Igihugu y’Abana igiye guterana ku nshuro ya karindwi izahuza abana bahagarariye buri Karere na buri Murenge bigize u Rwanda, abana bahagarariye abafite ibibazo bikomeye kurusha abandi (vulnerable children), abana bahagararaiye ababana n’ubumuga bunyuranye (Children with disabilities), bamwe mu bavuye mu nkambi z’impunzi, abahagarariye imfubyi, abahagarariye abana baba mu mihanda (street children/enfants de la rue) n’abo mu bindi byiciro.

Uretse abana, iyi nama izaba irimo n’abayobozi muri Leta bafite abana mu nshingano zabo, abahagarariye Ishami ry’Umuryango w’Abibumbye ryita ku bana (UNICEF), imiryango itegamiye kuri Leta n’izindi nzego zifite aho zihurira no kuvuganira no kwita ku burenganzira bw’abana.

NTWALI John Williams