Ku mugoroba w’itariki ya 2 Kanama, abanyamakuru babaye indashyikirwa mu marushanwa yasojwe tariki ya 3 Gicurasi uyu mwaka hatoranywa abatsinze, bashyikirijwe ku mugaragaro ibihembo bagenewe, mu gikorwa cyateguwe ku nshuro ya mbere n’Inama Nkuru y’Itangazamakuru mu Rwanda.

Abanyamakuru bose mu bahawe ibihembo batangarije IGIHE ko bishimiye iki gikorwa kuko ngo basanga ari ukubagariza uburyo umwuga bakora ushimwa n’Abanyarwanda kuburyo butangaje.

Etienne Gatanazi wa Televiziyo y’u Rwanda ni we wegukanye igihembo cy’umunyamakuru witwaye neza muri uyu mwaka, yatangaje ko yishimiye iki gihembo yahawe, avuga ko ibi bimwongerera ingufu zo kurushaho gukora kandi agateza imbere igihugu.

Gatanazi kandi yongeyeho ko kubera ko uyu mwuga akenshi usanga ukomeye kubera zimwe mu mbogamizi bahura nazo, nko kuvuga ibitagenda ariko nyamara ugasanga bikosorwa yumva ko atari uguhangana, bityo asaba ko abanyamakuru bajya barenganurwa mu gihe ari ngombwa.

Faith Mbabazi, umwe mu bayobozi bakuriye Orinfor, yatangarije abanyamakuru ko bagomba kuba koko ijisho rya rubanda bityo buri munyarwanda wese akabibonamo kandi akabagirira icyizere.

Faith Mbabazi yakanguriye abanyamakuru ko bakwiye gufata iyambere mu kugaragariza amahanga uburyo abanyarwanda bagenda barengana hirya no ku isi, bitewe n’intambara ikomeje kuvugwa m’ Burasirazuba bwa Congo, kuko ngo ngo mbere yo kuba abanyamakuru, bagomba kwibonamo ko ari Abanyarwanda.

Umunyamabanga Nshingwabikorwa w’Inama Nkuru y’Itangazamakuru Emmanuel Mugisha yatangarije IGIHE ko mu gutoranya inkuru zarushije izindi bitaga cyane yane ku kureba niba inkuru yujuje ibisabwa birimo kuba itabogamye, kandi ifite icyo ihindura ku buzima bw’abaturage n’umuryango nyarwanda muri rusange.

Abanyamakuru bahawe ibihembo birimo za mudasobwa, camera, ndetse n’ibindi. Aba banyamakuru, usanga biganjemo abakora ku maradiyo, ariko cyane cyane muri ORINFOR. Muri bo hari Tidjara Kabendera ukora kuri Radio Rwanda, Louise Nganyira, Ntirenganya Emma Claudine ukora kuri Radio Salus, Gerard Rugambwa wa La Nouvelle Releve, Marie Josée Uwilingira, Terence Muhirwa kubijyanye n’umuco akanakora kuri Radio Salus, Etienne Gatanazi, abo muri The New Times, Radio 10, n’abandi.