Inzego z’umutekano mu gihugu cya Nigeria, kuri uyu wa Mbere zatangaje ko zahitanye umuvugizi w’umutwe wa Boko Haram Abu Qaqa mu ntara ya Kano iherereye mu majyaruguru y’igihugu.

Umuvugizi w’ingabo za Nigeria yatangarije urubuga rwa BBC ko abandi barwanyi babiri baje gutabwa muri yombi ariko umwe akaza Kwitaba imana.

Akomeza avuga ko ingabo z’iki gihugu zahagaritse imodoka yari itwaye abantu 2 mu ntara ya Kano, ngo ubwo bageragezaga guhunga nibwo bahise baraswa.

N’ubwo ariko ingabo za Nigeria zitangaza aya makuru, ubuyobozi bw’umutwe wa Boko Haram bwo butangaza ko ibyo leta ya Nigeria ivuga ari ibinyoma kuko ngo muri abo bantu bishwe nta muvugizi wabo wari urimo.

Amakuru aturuka muri Nijeriya kandi aravuga ko abantu bamwe bari muri iyi modoka batangarije inzego z’umutekano ko uyu mugabo warashwe ari umuvugizi wa Boko Haram nta kabuza.

Umutwe wa Boko Haram wagiye ugaba ibitero mu bice bitandukanye bya Nigeria, aho kugeza ubu umaze guhitana abantu barenga 1,400.