Muri ibi bihe bidasanzwe, itangazamakuru riri mu byagizweho ingaruka zikomeye zirimo kubura amikoro ahagije, ibintu bishobora kuba byarabangamiye ubwisanzure bwaryo no gutangaza amakuru ahagije agenewe abaturage.
Inzego zitandukanye zishinzwe kureberera itangazamakuru mu Rwanda zisaba ko leta izareba uko umugambi wayo wo gufasha ibikorwa bitandukanye kongera kubyutsa umutwe nyuma yo guhungabanywa na COVID-19, wazagera no mu bitangazamakuru by’umwihariko.
Umuyobozi w’Urwego rw’Abanyamakuru Bigenzura (RMC), Cléophas Barore, yabwiye IGIHE ko urwego ayoboye rushima uburyo itangazamakuru ryitwara muri ibi bihe bikomeye byo guhangana na COVID-19, ariko asaba ko rutekerezwaho mu bihe byo kuzahura ubukungu bw’igihugu.
Yagize ati "Itangazamakuru riri mu byakomwe mu nkokora cyane mu mikoro; ubu nta muntu ujya kwamamaza, nta matangazo ndetse nta n’abishyura ibiganiro. Iki gihe cyahaye buri wese gutekereza ngo ariko mu gihe kiri imbere nzakora nte? Nzakora nte rero irimo gushaka abakozi, ibikoresho, ariko iri no gushaka amikoro.’’
Ni icyifuzo ahuje n’Umunyamabanga Nshingwabikorwa w’Inama Nkuru y’Itangazamakuru (MHC), Peacemaker Mbungiramihigo, uvuga ko muri ibi bihe itangazamakuru ryakoze mu buryo budasanzwe kandi bwatanze umusaruro ukwiye.
Ati "Umubare munini w’ibitangazamakuru mu Rwanda ugizwe n’abikorera; imibare itugaragariza ko ryahungabanye cyane mu bijyanye n’amikoro. Icyo duharanira ni uko ubuvugizi bwakomeza, mu ngamba zafashwe na leta n’abafatanyabikorwa batandukanye mu guhangana n’ingaruka z’ubukungu zatewe na COVID-19 […] itangazamakuru na ryo rizatekerezweho."
Ubufatanye bw’itangazamakuru ryaba irya leta z’ibihugu n’iryigenga bugaragaza umusaruro w’aho iki cyorezo kigeze gihashywa kuko mu bihugu bitandukanye, ingamba zikomeye zari zarashyizweho zatangiye koroshywa.
Umuryango w’Ubumwe bw’Uburayi ushimangira ko ugiye gushyigikira uruhare rw’itangazamakuru ryigenga kandi ryizewe ku Isi ndetse ko ubwisanzure bwaryo ari uburenganzira, ku itangazamakuru no ku baturage muri rusange.
Mu gihe hizihizwa Umunsi Mpuzamahanga w’ubwisanzure bw’itangazamakuru, umubare w’abakora itangazamakuru bamaze guhitanwa na COVID-19 ugera kuri 55 hirya no hino ku Isi, bitewe n’uko usanga nta bwirinzi buboneye bwabafasha kutandura iki cyorezo mu gihe bakurikirana amakuru yacyo.
Umuryango utegamiye kuri Leta, Press Emblem Campaign (PEC), wagaragaje ko abanyamakuru benshi bishyira mu kaga ko gutangaza inkuru ku cyorezo, ugasanga baracyanduye.
PEC ivuga ko kuva tariki 1 Werurwe, yabaruye impfu 55 z’abanyamakuru mu bihugu 23 bishwe na Coronavirus, gusa itangaza ko bitaramenyekana niba bose baranduriye mu kazi.
Itangazo rya PEC rivuga ko ‘abanyamakuru bari mu kaga gakomeye muri iki gihe cy’ikibazo gikomeye ku buzima kuko baba bagomba gukomeza kumenyesha abaturage ibiba, bajya mu bitaro, baganira n’abaganga, abaforomo, abanyapolitiki, inzobere, abahanga ndetse n’abarwayi’.
Equateur ni cyo gihugu gifite abanyamakuru benshi bishwe na Coronavirus bagera ku icyenda, ikurikiwe na Amerika ifite umunani, Brazil ifite bane, u Bwongereza na Espagne buri kimwe gifite batatu.
Mu Rwanda, nta munyamakuru n’umwe uravugwa mu mibare y’abanduye COVID-19.
TANGA IGITEKEREZO