Abadepite 15 bo mu gihugu cya Uganda bari kumwe n’Ambasaderi Richard T Kabonero, basuye Ikigo cy’Igihugu cy’iterambere (RDB) mu rwego rwo kwigira ku bikorwa bya RDB bitandukanye bizamura iterambere.

Thony Nsanganira, umuyobozi mukuru wungirije w’agateganyo muri RDB, yabasobanuriye ibikorwa bitandukanye bya RDB n’amashami ayigize, harimo ishami rishinzwe ubukerarugendo, iry’ishoramari, ikoranabuhanga, ibigo by’ imari biciriritse, ishami rishinzwe kwegurira ubushobozi abikorerara, ishami ryo korohereza ishoramari mu bucuruzi, ikigo cy’igihugu gishinzwe kubungabunga ibidukikije n’ ibindi.

Nsanganira yabasobanuriye ko u Rwanda rworohereza abashaka gushora imari mu bikorwa bitandukanye.

Ikindi kandi mu rwego rwo kurwanya ubushomeri, Abadepite ba Uganda yabasobanuriye ko urubyiruko rutozwa gukora no kwihangira imirimo hakiri kare ku bufatanye na Minisiteri y’urubyiruko n’ikoranabuhanga.

U Rwanda rworohereza abashoramari mu nzego nyinshi zitandukanye zirimo ubuhinzi, ingufu, ibikorwaremezo, ubucuruzi, ubukerarugendo, ikoranabuhanga n’ibindi. Yemeza ko ari ibikorwa by’ingenzi bikwiye gusangizanya ibitekerezo mu kuzamura iterambere ry’ibihugu byombi.

Uru rugendo rwari rugamije kungurana ubumenyi mu guteza imbere ishoramari ritandukanye ruzafasha Igihugu cya Uganda mu bikorwa byacyo by’iterambere.

Aba badepite banasuye aho umushoramari ugannye RDB asobanurirwa ibintu byose ahantu hamwe atiriwe azenguruka hirya no hino (One stop Center.)