Kuri uyu wa Kane Inteko Ishinga Amategeko Imitwe yombi yarateranye yiga ku bibazo birebana n’ububanyi n’amahanga; nyuma y’ibisobanuro birambuye byatanzwe na Minisitiri Louise Mushikiwabo, ibyumba byombi by’Inteko byanzuye byamagana umutwe ushinzwe kubugabunga no gutekanya Congo Kinshasa MONUSCO, ndetse bisaba Loni gukora iperereza harebwa niba uwo mutwe utaratandukiriye mu nshingano wahawe.

Ibibazo birebana na Congo Kinshasa ahanini ni byo byibanzweho mu byo abagize Inteko Ishinga Amategeko basabye Minisitiri w’Ububanyi n’Amahanga Louise Mushikiwabo gutangaho ibisobanuro, aho benshi mu badepite n’abasenateri bagarutse ku bimenyetso bigaragaza ko MONUSCO yakomeje kujya igirana imikoranire na FDLR, bibaza impamvu nyakuri y’ubwo bushuti buri mu bikomeje gutera imidugararo muri icyo gihugu.

Banagarutse kandi ku muryango Human Rights Watch na raporo uherutse gushyira ahagaragara ishyira u Rwanda mu majwi, aho benshi mu bagize Inteko banzuye bemeza ko uyu muryango wanga u Rwanda.

Visi Perezida wa Sena, Bernard Makuza, yagize ati: “MONUSCO yashyizweho kugirango ifashe ubutegetsi bwa Congo kugarura amahoro, ariko aho kugirango ishyire ibi mu bikorwa,ifitanye imikoranire na FDLR. Ikwiye kugaragaza aho ihagaze bityo tukamenya ukuri kw’ibintu.”

Biteganyijwe ko mu kwezi gutaha Loni izafata icyemezo ku birebana no kongerera MONUSCO igizwe n’abasirikare barenga 20,000 igihe cyo gukomeza gukorera muri Congo Kinshasa; ibi byagarutsweho n’abagize Inteko Ishinga Amategeko basaba Loni kubanza kureba niba uyu mutwe ukoresha hafi miliyari 1,5 ku mwaka mu bikorwa byawo uri kuzuza inshingano wahawe. Benshi bagaragaje ko n’ubwo MONUSCO imaze imyaka 13 ikorera muri icyo gihugu nta musaruro na mba yagize.

Minisitiri Mushikiwabo yagarutse kuri raporo zishyira u Rwanda mu majwi zirushinja gufasha inyeshyamba za M23 avuga ko mu gukorwa kwazo haba hashyizwe imbere inyungu z’ibihugu runaka kuburyo aho kugirango ibibazo bikemuke, birushaho gufata indi ntera, bityo ngo bigatera kwibaza niba baba baje gukemura ibibazo cyangwa baba baje kurushaho kubyongera.”

Yakomeje abyira abagize Inteko Ishinga Amategeko ko guverinoma y’u Rwanda ikomeje kugaragaza impungenge ifite ku bikorwa yavuze ko biteye isoni bya MONUSCO, kandi ngo bazakomeza kugaragariza izo mpungenge inzego zo hejuru za Loni mu rwego rwo gushaka ibisubizo,

Abagize Inteko Ishinga Amategeko kandi bagarutse ku banyarwanda baherutse kugezwa ku mupaka w’u Rwanda nyuma yo kumara iminsi mu maboko y’ingabo za Leta ya Congo FARDC, aho byavuzwe ko bakorewe iyicarubozo, aha Mushikiwabo yabamenyesheje ko bandikiye Leta ya Congo bayibaza kuri iki kibazo.

Abagize Inteko Ishinga Amategeko kandi bamaganye ibikorwa bya Kinyamaswa bikomeje gukorerwa Abakongomani bavuga ururimi rw’Ikinyarwanda, ndetse bamwe muri bo kuri ubu bakaba bari mu buhungiro mu Rwanda.

Hagati aho hari amakuru avuga ko raporo y’impuguke za Loni ivuga ku birebana n’u Rwanda na Congo yaba ikomeje kuburizwamo.