Mu gihe kuri uyu wa gatandatu tariki ya 11 Kanama 2012 hatangizwaga ku mugaragaro ibirori by’imyiteguro yo kwizihiza isabukuru y’imyaka 25 Umuryango FPR INKOTANYI umaze uvutse, abajyanama b’ubuzima bo mu Murenge wa Kayenzi mu Karere ka Kamonyi bibumbiye muri Koperative KOAKA ABASANGIYUBUZIMA, baboneyeho umwanya wo gutaha ku mugaragaro imodoka biguriye nk’abanyamuryango babitewemo inkunga na Ministeri y’Ubuzima.

Ibi birori byabereye mu Kagari ka Bugarama mu Murenge wa Kayenzi.

Iyi modoka aba bajyanama b’ubuzima babashije kwigurira bavuga ko mu by’ukuri bayikesha Umuryango FPR INKOTANYI, kubera imiyoborere myiza ituma Leta itekereza abaturage bafite ubushobozi buke, bityo ikabasha kubabumbira muri Koperative kugira ngo ibikorwa by’iterambere bibagereho. Aba bajyanama b’ubuzima bashimiye byimazeyo Leta y’u Rwanda, kubera ibikorwa by’iterambere imaze kugeza ku baturage hirya no hino mu gihugu.

Nk’uko aba bajyanama b’ubuzima babyivugira ngo iyi modoka izabafasha kwiteza imbere kuko imirimo ikora hirya no hino mu Murenge no hanze yawo yinjiriza Koperative yabo amafaranga menshi.

Uhagarariye Umuryango FPR INKOTANYI Wungirije ku rwego rw’Intara y’Amajyepfo Vuganeza Aaron, yashimiye abanyamuryango muri rusange, by’umwihariko yasabye aba bajyanama b’ubuzima kuzakoresha neza umusaruro uzava mu modoka babashije kugeraho, kugira ngo intambwe bateye itazasubira inyuma.

Depite Rwaka Pierre Claver mu butumwa bwe, yibukije amavu n’amavuko y’Umuryango FPR INKOTANYI ,akaba yavuze iki ari igihe cyo gusubiza amaso inyuma, abanyarwanda bakisuzuma bakareba aho bavuye ndetse n’aho bageze bityo bagafa ingamba ku cyerekezo cyabo.

Iyi ntumwa ya rubanda mu Nteko Ishinga Amategeko y’u Rwanda, yavuze muri iyi myiteguro ibiganiro bizatangwa bizagaruka ku mateka y’Umuryango FPR Inkotanyi, ibyagezweho, indangagaciro zatumye Umuryango ugera kuri ibyo bikorwa n’icyerekezo cy’ejo hazaza.

Depite Rwaka yashimiye ibikorwa abanyamuryango ba Kamonyi bagezeho kuko bigaragaza agaciro baha inyungu z’igihugu no guharanira buri gihe kuba intangarugero muri byose.

Uretse iyi modoka yatashywe ku mugaragaro, muri ibi birori hatanzwe kandi amagodora agera kuri 50 yahawe imiryango y’abatishoboye mu rwego rwo gusezera nyakatsi yo ku buriri. Hatanzwe kandi inka 10 zifite agaciro ka miliyoni 3, izi nka zikaba zaraguzwe n’abanyamuryango ba FPR mu byiciro binyuranye bazigenera abatishoboyoye bakaba bazishyikirijwe kuri uyu munsi. ibi birori byaranzwe kandi n’umukino w’umupira w’amaguru wahuje Akagari ka Mataba na Nyamirama twombi two mu Murenge wa Kayenzi.

Faustin Ntakirutimana, Ushinzwe Itangangazamakuru mu Karere ka Kamonyi.