00:00:00 IGIHE NETWORK KN KINYARWANDA EN ENGLISH FR FRANCAIS

Abakora umwuga w’ivugururamibereho barifuza umunsi ngarukamwaka

Yanditswe na

Jean Baptiste Micomyiza

Kuya 21 November 2012 saa 05:55
Yasuwe :

Abakora umwuga w’ivugururamibereho ari byo byitwa ‘social work’ mu cyongereza, barifuza ko habaho umunsi ngarukamwaka wo kuzirikana umwuga w’ivugururamibereho. Iki cyifuzo cyatangiwe i Kigali kuri uyu wa 20 Ugushyingo 2012, mu imurika ry’ubushakshatsi ryateguwe n’agashami k’ivugururamibereho ko muri Kaminuza Nkuru y’u Rwanda iryo murika rikaba ryari igamije kugaragaza uruhare rw’umwuga w’ivugururamibereho mu kurwanya ubukene no kugera ku ntego z’ikinyagihumbi.
Iri murika ry’ubushakashatsi ryateguwe (...)

Abakora umwuga w’ivugururamibereho ari byo byitwa ‘social work’ mu cyongereza, barifuza ko habaho umunsi ngarukamwaka wo kuzirikana umwuga w’ivugururamibereho. Iki cyifuzo cyatangiwe i Kigali kuri uyu wa 20 Ugushyingo 2012, mu imurika ry’ubushakshatsi ryateguwe n’agashami k’ivugururamibereho ko muri Kaminuza Nkuru y’u Rwanda iryo murika rikaba ryari igamije kugaragaza uruhare rw’umwuga w’ivugururamibereho mu kurwanya ubukene no kugera ku ntego z’ikinyagihumbi.

Iri murika ry’ubushakashatsi ryateguwe muri gahunda y’umushinga ukorera muri Afurika y’Iburasirazuba witwa PROSOWO (Promotion of Professional Social Work ), ukaba ugamije guteza imbere umwuga w’ivugururamibereho mu kurwanya ubukene no kuvugurura imibereho y’abaturage.

Abize ibijyanye n’uyu mwuga bakurikije akamaro ufitiye igihugu ariko ugasanga uwo mwuga utazwi, bifuje ko habaho umunsi ngarukamwaka wawo kuko basanga byabafasha mu gutuma uyu mwuga umenyekana, dore ko n’ibikorwa bavuga ko bihari.

Charles Rutikanga, umwarimu w’ivugururamibereho muri Kaminuza Nkuru y’u Rwanda akaba n’umuhuzabikorwa w’umushinga PROSOWO mu Rwanda, asobanura ko uyu mwuga usanga abawukora bashakirwa andi mazina aho bakora.

Ati “Umwuga w’ivugururamibereho watangiye kwigishwa muri kaminuza zo mu Rwanda kuva mu mwaka wa 1999 bitangiriye muri kaminuza nkuru y’u Rwanda. Abanyeshuri basoza amasomo yabo iyo bagiye gukora akazi mu bigo bitandukanye kajyanye n’ibyo bize usanga batitwa amazina ajyanye n’umwuga wabo. Ari abagana abatanga iyo serivisi usanga batazi ko ari serivisi y’ivugururamibereho, ndetse no mu nzego z’ubuyobozi bwa leta usanga batazi uyu mwuga.”

Umwe mu bitabiriye iri murika ry’ubushakashatsi akaba yaranize iby’ivugururamibereho, Rebecca Asiimwe ukora ubukangurambaga bugamije iterambere mu mushinga Techno Serve, asobanura ko yifashisha ubumenyi bw’umwuga w’ivugururamibereho mu kazi ke ka buri munsi.

Rebecca Asiimwe avuga ati “Njyewe akazi nkora gafasha mu igabanuka ry’ubukene; nko kuba nkora muri serivisi ikora ubukangurambaga mu baturage aho tubigisha kugana amabanki, uburyo bwo kunoza ubworozi, ibi byose bikaba bifasha abaturage kuzamura ubukungu bwabo.”

Umushinga PROSOWO muri Afurika y’Iburasirazuba ukorera muri kaminuza za Nairobi University mu gihugu cya Kenya,Makerere University muri Uganda , Institute of Dar es Salaam muri Tanzania na Carinthia University of Applied Sciences yo ku mugabane w’u Burayi mu gihugu cya Otirishe hamwe no muri Kaminuza Nkuru y’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .