Mu kazi kabo ka buri munsi ko gutara amakuru, kuyatunganya, kuyandika no kuyatangaza, abanyamakuru n’abandi banyamwuga b’itangazamakuru basabwa gufata amahame ngengamyitwarire mu mwuga, kuyafata nka Bibiliya yabo.

Kuri uyu wa Gatatu tariki ya 29 Mutarama 2013, i Remera, abanyamakuru n’abandi bafatanyabikorwa mu itangazamakuru, Inama Nkuru y’Itangazamakuru mu Rwanda, yafashe umwanya wo gusobanura amahame ngengamyitwarire mu mwuga w’itangazamakuru, bityo biba n’umwanya wo kurebera hamwe uburyo ayo mahame yashyirwa mu bikorwa.

Umunyamabanga Nshingwabikorwa w’Inama Nkuru y’Itangazamakuru, Mugisha Emmanuel, atangaza ko uwo ari umwanya wo kuganira n’abanyamakuru n’abandi ba nyamwuga b’itangazamakuru ku mahame ngengamyitwarire mu kazi kabo ka buri munsi. Yagize ati “Umwuga mukora ufite uruhare rukomeye mu buzima bw’igihugu. Kugira ngo abantu mugezaho amakuru bashobore kunezezwa n’ibyo mukora, bisaba ko mukurikiza amabwiriza abayobora. Umuntu uzi amabwiriza amugenga, uzi uburenganzira bwe n’aho agarukira ntashobora kugira ikibazo mu kazi ke.”

Umuvugizi Mukuru wa Polisi y’Igihugu, Supt Theos Badege, yatangaje ko impamvu Polisi ishaka umwanya wo gukorana n’itangazamakuru, ni uko ari umuyoboro ukomeye ubafasha kumenya no kumenyekanisha ibibera hirya no hino mu gihugu. Asaba abanyamakuru kubahiriza amategeko. Agira ati “Turi mu bihe byo kubaka imiyoborere myiza kandi ikiza mbere ni ukubahiriza amategeko.” Asaba Inama Nkuru y’Itangazamakuru guha ingufu amahame ngengamyitwarire y’abanyamakuru, kuko bifasha kumenya ibigomba gukorwa, ibibujijwe n’umurongo ngenderwaho.

Rushingabigwi Jean Bosco, Umuyobozi w’inzu y’itangazamakuru atangaza ko amabwiriza ngengamyitwarire y’abanayamakuru ko ari imihigo ibaranga mu kazi kabo. Agira ati “Abanyamakuru nibubahiriza amahame y’umwuga wabo, ibibazo bahura na byo mu kazi bakora bizagabanyuka nibura kugeza kuri 80%.”

Namahoro Alex, umunyamakuru muri ORINFOR ukorera Radio y’abaturage y’i Nyagatare, aganira na IGIHE yadutangarije ko hari byinshi yungutse byiyongereye ku bumenyi yari asanganwe kandi atazabyihererana. Yagize ati “Ubumenyi nungutse ngiye kubusangiza abandi cyane cyane abashya mu mwuga w’itangazamakuru.”

Amahame ngengamyitwarire yashyizweho bwa mbere mu Rwanda mu 2004, avugururwa mu 2011.