Mu gihe abasirikare batatu muri bane bari mu rubanza rumwe na Ingabire Victoire bavuga ko barangije igifungo cyabo ndetse bagasaba ko barekurwa, bushinjacyaha bwo si ko rubibona kuko ngo hari igihe bafunzwe binyuranyije n’amategeko. Ibi rero biramutse byemejwe bashobora gufungwa ikindi gihe cy’inyongera ku cyari giteganyijwe.

Impaka kuri iri gunga n’ifungurwa ry’aba basirikare zongeye kuvuha kuri uyu wa Mbere Tariki ya 25 Werurwe ubwo bongeraga kugaragara mu Rukiko rw’Ikirenga, mu rubanza rw’ubujurire rwa Ingabire.

Ikibazo muri uru rubanza cyagaragaye ubwo Lt Col Tharicisse Nditurende na Lt.Col Habiyaremye Noel, bavuga ko batawe muri yombi bari mu gihugu cy’u Burundi tariki 22 Nzeri 2009, ariko uruhande rw’Ubushinjacyaha bwo bukemeza ko n’ubwo batawe muri yombi kuri iyi tariki, bafunzwe ku buryo bwemewe n’amategeko tariki ya 24 Ukwakira 2010.

Ubushinjacyaha ngo bushingira kuri iyi tariki, kuko ngo ubwo inzego z’umutekano mu Burundi zabazanaga mu Rwanda arizo zari zifatiye ikimezo kubera ko aba basirikare babaga ku butaka bw’iki gihugu nta byangobwa, kandi ko ukuza kwabu kutasabwe na Leta y’u Rwanda, ibi ngo bikagaragazwa n’uko batashyikirijwe inzego z’ubutabera z’u Rwanda, ahubwo bahawe abashinzwe abinjira n’abasohoka.

Ibi ariko byatewe utwatsi n’abaregwa bavuga ko hakwiye kuvaho urujijo ruvuga ko batafunzwe tariki ya 22 Nzeri 2009, aha Lt Col Tharicisse Nditurende akaba yatangaje ko ikigaragaza ko bafatiwe mu gihugu cy’u Burundi bizwi n’impande zombi, ngo biri no mu mpapuro bahawe na Gen. Nshimiyimana Adolfe ukuriye ipereza ry’u Burundi, aho ngo bajyejejwe ku mupaka w’Akanyaru bagahabwa Ingabo z’u Rwanda zahise zijya kubafungira mu kigo cy’iKami.

Ibyerekeye impapuro zerekana ko bafunzwe n’igihe bafungiwe Nditurende yagize ati “Ibi ntago aritwe dukwiye kubibazwa, bikwiye kubazwa abayobozi b’I Kami kuko mu gihe cyingana n’amezi 7 twayafunzwe ku buryo bukomeye.”

Ibi rero byatumye Lt Col Habiyaremye Noel, Major. Vital Uwumuremyi, na L.C Nditurende Tharcisse basaba Abacamanza ko basaba inzego za Gereza zikabarekura, kuko ngo barengeje igihe cyo gufungwa, ariko Ubucamanza bukaba bwemeje ko tariki ya 28 Werurwe aribwo ubu busabe bwabo buzasubizwa.

Capt. Karuta Jean Marie Vianney yari yakatiwe igifungo cy’imyaka ibiri n’amezi arindwi we akaba yaranarekuwe, Lt. Col Nditurende Tharcisse na Maj. Vital Uwumuremyi bakatirwa imyaka 3 n’amezi atandatu, ariko bagafungwamo imyaka 2 n’amezi atandatu, umwaka usigaye ukaba insubikagifungo kizakorwa mu myaka ibiri ;Lt Col. Habiyaremye Noel we akatirwa imyaka ine n’amezi atandatu, ariko agafungwamo itatu, umwaka usigaye akaba insibikagifungo y’imyaka ibiri.

Aba basirikare bose uko ari bane, bari mu rubanza rumwe na Ingabire, we wakatiwe gufungwa imyaka umunani.