Abaturage batuye mu Kagari ka Kiyovu baratangaza ko muri ibi bihe byo kwibuka ku nshuro ya 19 Jenoside yakorewe Abatutsi muri Mata 1994, biteguye gufasha ushobora kugira ihungabana.

Mu gihe muri uyu mwaka ibikorwa byo kwibuka Jenoside yakorewe Abatutsi muri Mata 1994, bizajya bibera ku midugudu, abaturage batuye muri imwe mu midugudu igize Akagari ka Kiyovu ari yo Amizero, Muhabura, Cercle Sportif ndetse na Rugunga, baratangaza ko biteguye gukora ibishoboka byose bagafatanya n’abajyanama b’ubuzima babihuguriwe, mu gihe habonetse umuntu wagira ihungabana.

Ubwo batangiraga ibikorwa byo kwibuka Jenoside yakorewe Abatutsi, Kalisa Jean Umuyobozi w’Umudugudu w’Amizero yatangaje ko bafite Abajyanama b’ubuzima bahuguriwe gutanga ubufasha mu gihe habonetse umuntu ugize ihungabana muri ibi bihe byo kwibuka Jenoside, avuga ko bazafatanya, ati “ Muri uyu mudugudu wacu turiteguye gufashanya hagize ugira ihungabana, kandi ubwitabire bw’abaturage mu bikorwa byo kwibuka Jenoside yakorewe Abatutsi muri Mata 1994, buri ku kigereranyo cya 75% ariko duteganya ko uziyongera ukagera ku 100%”.

Ingabire Fanny Umunyamabanga Nshingwabikorwa w’Akagari ka Kiyovu yabwiye abari bateraniye kuri site ya "Lycee de Kigali", ko bagomba gufata mu mugongo no guhumuriza abacitse ku icumu rya Jenoside yakorewe Abatutsi muri Mata 1994.

Kuri ubu mu Kagari ka Kiyovu gaherere mu murenge wa Nyarugenge, Akarere ka Nyarugenge, habarizwa amasite (sites) agera kuri atatu ateraniraho abaturage mu bikorwa byo kwibuka ku nshuro ya 19 Jenoside yakorewe Abatutsi muri Mata 1994, ari yo Site ya Lycee de Kigali, EPR n’iya KHI.

Hatangwa amahugurwa menshi ku gufasha abahungabana