Abayobozi bakuru mu gihugu cya Lesotho bo muri Minisiteri y’ubutegetsi bw’igihugu bagiriye uruzinduko ku rwego rw’Umuvunyi, kugira ngo bigire ku Banyarwanda bumwe mu buryo bakoresheje mu gukumira ruswa n’akarengane.

Bayobowe na Minisitiri w’intebe wungirije akaba na Minisitiri w’Ubutegetsi bw’igihugu Ntai Makoetje, basobanuriwe bumwe mu buryo Abanyarwanda bakoresha mu gukumira ruswa n’akarengane.

Umunyamabanga mukuru ku rwego rw’umuvunyi Mbarubukeye Xavier, yasobanuriye Abayobozi ba Lesotho ko kugira ngo Abanyarwanda bakumire ruswa n’akarengane, abaturage basobanuriwe ko umuntu wese akwiye kurangwa n’ubunyangamugayo mu byo akora. Ati “Abanyarwanda bamaze kumenya agaciro kabo, bazi neza ko ruswa n’akarengane ari umwanzi w’iterambere; bo ubwabo bahagurukiye kurwanya ruswa n’akarengane.”

Mbarubukeye yasobanuriye Abanyalesoto ko urwego rw’umuvunyi rukoresha uburyo butandukanye kugira ngo hakumirwe burundu ruswa n’akarengane, bumwe muri ubwo buryo bukaba burimo kumvisha abaturage ko ntacyo bagomba kwakwa cy’ikiguzi kugira ngo bahabwe icyo bakeneye ndetse n’abayobozi bagatozwa umuco wo kumva ko babereyeho gufasha abaturage.

Ubundi buryo bukoreshwa ni ugutoza urubyiruko kwirinda ruswa n’akarengane ndetse no gukoresha ibyapa bikangurira abaturage kwirinda ruswa n’akarengane.

Ntai Makoetje wari uyoboye izi ntumwa za Lesotho yatangarije abanyamakuru ko bimwe byo bigiye ku Banyarwanda ari ukumenya kwiyubaha, umuntu agakora ibyo ashinzwe atagombye kubihemberwa mbere y’uko abikora.

Yagize ati “Abanyafurika babura ikintu cy’ubunyangamugayo bigatuma bananirwa gufashanya bo ubwabo. Umuntu bakamushinga kuyobora abantu. Iki ni na cyo gituma umugabane wacu uhoramo umwiryane ushingiye ku busa, aho kugira ngo abantu bafashanye bakarangwa n’intambara.”

Itsinda ry’abanyalesoto ryasuye urwego rw’umuvunyi ryari ryaje mu Rwanda rinitabiriye inama mpuzamahanga yo kwizihiza isabukuru y’imyaka 25 umuryango wa FPR Inkotanyi umaze uvutse.