Bamwe mu bashoferi n’abaherekeza abagenzi (convoyeurs) ba koperative “City Centre,” barinubira ko bakwa amafaranga yitirirwa ikigega “Agaciro Development Fund” kuko batanze ibihumbi 10 nk’umusanzu wabo muri iki kigega, nyamara ubuyobozi bwa koperative bwo bukabihakana bwivuye inyuma.

Mu kiganiro na IGIHE, umwe mu bashoferi utarashatse ko izina rye ritangazwa yagize ati “biratubangamiye kubona twakwa amafaranga magana atatu kuri buri parking yitirirwa ikigega Agaciro nyamara twaratanze ibihumbi icumi muri iyo gahunda!”

Abavuga ko bafite iki kibazo ni abakora kuri ‘ligne’ ya Gatsata, aho ngo batanga amafaranga magana atatu kuri ‘parking’ yo mujyi rwagati, bagera i Nyabugogo bikaba uko ndetse na Karuruma, yose hamwe akaba magana cyenda ku munsi.

Ku ruhande rwa Koperative ariko ntibemera ibi birego. Ngabo Godefrey, Perezida wa Koperative “City Center” bakoreramo ikaba n’imwe mu makoperative agize RTFC (Rwanda Transport Federation Cooperative), anyomoza ibyo aba bashoferi bavuga. Avuga ko ari igihuha kidafite ishingiro.

Tuganira yagize ati “amafaranga magana atatu atangwa kuri ‘parking’ ni aya Koperative ntabwo ari ay’ikigega Agaciro. Abashoferi n’abaherekeza abagenzi bafatanyije biyemeje gutanga umusanzu wabo w’ibihumbi icumi. Hari abayatanze hari n’abatarayatanga. Bose babikora bakurikije ubushobozi bwabo.”

Ngabo avuga ko ibyo babikora nta gahato. Ubundi ngo bari biyemeje kuyatanga bitarenze ukwezi kwa Nzeri, ariko kubera ko amezi ya Nzeri n’Ukwakira arangwa n’imvura umusaruro ukaba muke bituma hakiri abagitegerejwe.

Ikindi avuga ni uko amafaranga magana atatu atangwa kuri za “ligne” zose zo mu mujyi atari umwihariko w’iya Gatsata gusa.