Kuri uyu wa kabiri tariki ya 26 kamena muri Hotel sport view, Ubuyobozi bw’Akarere ka Gasabo bwamuritse kandi bwemeza ku mugaragaro ingengo y’Imari y’umwaka wa 2012-2013

Iki gikorwa cyabereye mu ruhame rw’Abagize Njyanama y’Akarere, abakuru b’imirenge ba rwiyemezamirimo hamwe n’Abashyitsi ba minisiteri y’Imari n’Igena migambi ndetse n’ Umuyobozi w’Umujyi wa Kigali.

Nkuko byatangajwe n’Umuyobozi w’Akarere ka Gasabo Ndizeye Willy, Ingego y’imari kazakoresha ingana na miliyari 15 na miliyoni 500 (15 500 000 000Frw).

46 ku ijana by’amafaranga agize iyi ngingo y’imari, akomoka mu misoro y’Akarere mu gihe asigaye aturuka mu nkunga za Leta.

Ubusanzwe ingingo y’Imari itegurwa hagendewe ku mwiherero wa bayobozi bakuru ba Leta, intego za gahunda ya Leta z’Imbatura bukungu, intego z’Ikinyagihumbi ndetse n’ibindi bikorwa. Aya mafaranga yose akoreshwa mu bikorwa rusange bigize ubuzima bw’akarere, nk’ubuhinzi, imiturire, ubukerarugendo, guhugura abakozi, ibikorwa remezo, gufasha abatishoboye n’ibindi.

Mu ijambo rye, Umuyobozi w’Umujyi wa Kigali Fidel Ndayisaba yibukije ko ingengo y’Imari( 2012-2013)ari ubuzima bw’Akarere bw’umwaka wose, asaba ko igomba guhabwa agaciro, bityo ntawe ufite uburenganzira bwo kubihindura uko yishakiye.

Yakomeje avuga ko ikibazo kitagaragajwe muri iyo ngengo y’Imari kitagomba kwitabwaho n’iyo cyaba gikomeye.

Asoza, Ndayisaba yavuze ko gushyira mu bikorwa neza ibyo iyi ngengo y’Imari igaragaza byakagombye gushimisha abayiteguye ndetse n’abagenerwa bikorwa aribo baturage.

Umwe mu baturage ba Gasabo akaba na rwiyemezamirimo mu bujyanama bw’Ishoramari n’Imisoro, Sebera Martha yashimye uko iyo ingengo y’Imari iteguye avuga ko itanga amahirwe ku bukerarugendo kandi ikaba ifite umwihariko mu kwibuka uburinganire.

Akarere ka Gasabo ni kamwe mu turere dutatu tugize umujyi wa Kigali, gafite imirenge cumi n’itanu, niko kanini mu mujyi wa Kigali kuko kagize 58% byawo.