Muri raporo uru rwego rwashyize ahagaragara, mu kiganiro rwagiranye n’abanyamakuru ku wa gatanu tariki ya 3 Nyakanga 2015, iyi mibare yagaragajwe mu buryo bukurikira:

Muri rusange ubushinjacyaha bwabonye ko hari ibibazo (Cases) 137, biregwamo abantu 197. Muri bo, 147 bahamwe n’ibyaha baregwaga byo kunyereza, urukiko rubategeka kwishyura 411,920,650 z’amafaranga y’u Rwanda, mu gihe abandi 50 bagizwe abere, izi manaza zikaba ari izaburanishijwe kuva muri Werurwe 2013 kugeza muri Gicurasi 2015.

Uretse kunyereza umutungo wa leta kandi hari n’abarezwe kunyereza uw’amakoperative na banki, aho muri rusange icyaha cyahamye abantu 256, inkiko zitegeka ko bishyura 857,099,848 z’amafaranga y’u Rwanda, mu gihe cyari gikurikiranywe ku bantu 333, bivuze ko 77 bagizwe abere.

Umushinjacyaha mukuru Muhumuza Richard yavuze ko ubushinjacyaha buzakomeza gukurikirana abanyereza umutungo wa leta mu buryo bwose bushoboka.

Ikindi yavuze n’uko biciye mu bushinjacyaha ikigero leta itsindiraho abakuriranyweho ibi byaha cyazamutse.

Yagize ati “Mu mwaka wa 2011-2012 byari ku kigero cya 52.9% ariko cyagiye kizamuka ukurikije imyaka.”

Mu mwaka w’ingengo y’imari 2012-2013 leta yazitsinze ku kigero cya 57%, mu wa 2013-2014 kigera kuri 68.8% mu gihe muri uyu mwaka wa 2014-2015 byageze ku kigero cya 73.7%.

Hashingiwe kuri raporo y’umugenzuzi w’imari ya Leta mu mwaka wa 2012-2013, ubushinjacyaha bukuru bwakoze iperereza ku birego 88 byaregwagamo abantu 125 baregwaga gucunga nabi umutungo wa leta usaga 2,227,390,658.

Abantu 3 bemeye amakosa bishyura miliyoni y’amafaranga y’u Rwanda, abandi 114 basubije imisoro batari baratanze n’andi mafaranga arimo ayo bahabwa bajya mu butumwa bw’akazi, ntakoreshwe ariko ntibanayasubize, yose hamwe akaba yari 47,542,677.

Muri uyu mwaka dosiye zagaragayemo ibibazo ni 361, abantu 456 bakaba baragejejwe imbere y’inkiko ngo zibakurikiraneho gukoresha nabi umutungo wa leta ungana na 15,462,468,449 z’amafaranga y’u Rwanda.

Abakozi ba leta 212 bakora mu bigo 57 bakoze amakosa 187 y’imyitwarire mu kazi.

[email protected]
twitter:@NtakirutaDeus