Urwego rw’Umuvunyi mu nshingano zarwo zo kwimakaza imiyoborere myiza, kurwanya akarengane, ruswa n’ibindi byaha bishamikiye kuri yo, rurakangurira abarugana bafite ibibazo by’akarengane kwitwaza ikaye y’umuturage, hirindwa ikinyoma cyakunze kugaragara kuri bamwe bageza ibibazo byabo kuri uru rwego, mu gihe biba bikurikiranwa ngo bikemurwe.

Ikayi y’umuturage yashyiriweho kwerekana imiterere y’ikibazo, igihe cyakiriwe, uwagikemuye n’uburyo cyakemuwe mu nzego z’ibanze.

Nkurunziza Jean Pierre, Umuvugizi w’Urwego rw’Umuvunyi yatangaje ko mu bibazo bakira hari ibyo batangira gukurikirana bagera aho byabereye bagasanga hari ubwo ibyo uwatanze ikibazo yavuze aba yarabeshye. Yagize ati “iyo twakira ikibazo, tubanza kubaza nyira cyo izindi nzego yakigejejeho, cyane cyane tuba dushaka ko ibibazo byose bibanza kunyura mu nzego z’ubuyobozi bw’ibanze, mu gihe iyo kayi yerekana uko byagenze idahari, hari ushobora kutubeshya.”

Ikindi Nkurunziza avuga ni uko bamwe mu baturage bahindura ibibazo uko umuyobozi ahindutse cyane cyane iyo byakemuwe mu buryo batishimiye, iyikayi ikaba isabwa mu rwego rwo kumenya ukuri ku bibazo byakirwa n’Urwego rw’Umuvunyi biturutse mu baturage.

Iyi kayi ngo ikorerwa ku rwego rw’akagari, igashyirwaho umukono n’umuntu wese wagize uruhare mu ikemurwa ry’ikibazo, ariko ahanini irebana n’ibibazo bisaba ko inzego z’ibanze uhereye ku mudugudu z’ibigiramo uruhare.

Ibi ariko ntibibuza ko ugana Urwego rw’Umuvunyi wese agomba kubanza kugeza ikibazo cye mu nzego bireba, bitewe n’imiterere yacyo.

Urwego rw’Umuvunyi rukaba ruhamagararira abaturage barugana, kujya baza bitwaje iyo kayi, kuko bituma ibibazo byabo bisabonuka ndetse bikaba byatuma gukemurwa kw’ikibazo byihuta.