Abageze mu za bukuru hirya no hino mu gihugu barashishikarizwa guhaguruka, bagafata iya mbere mu gukemura amakimbirane mu miryango nk’umusanzu wabo mu gushimangira intambwe y’iterambere n’amahoro mu miryango.

Tariki ya 4 Ugushyingo 2014, Umuryango Sindagiza wifatanyije n’abageze mu zabukuru bo mu murenge wa Kigali barenga 300 mu kwizihiza umunsi mpuzamahanga wabahariwe. Uyu munsi mpuzamahanga ubusanzwe wizihinzwa ku itariki ya 1 Ugushyingo ku Isi yose. Uyu mwaka mu Rwanda ukaba wari wahawe insanganyamatsiko igira iti “Abageze mu zabukuru umusanzu wanyu mu gukemura amakimbirane urakenewe”.

Abageze mu zabukuru bari bakereye uyu munsi, bashyizwemo intege no kubona umuyobozi w’Akarere ka Nyarugenge aje mu birori byabo, bacinya akadiho nk’abasore n’inkumi. Bagaragaje ko n’ubwo imbaraga z’ubusore ntazo bagifite, ariko ubunararibonye bwabo biteguye gukomeza kubukoresha mu kubuka igihugu nk’uko babikoze kuva bakivuka.

Umwe mu bageze mu zabukuru witwa Karangwa Vincent, yavuzeko mu byo bafite harimo uburere ndetse n’ubushobozi bwo gukemura amakimbirane nk’uko insanganyamatsiko yabivugaga. Yabanje kubwira abari aho amateka y’umusozi wa Kigali usanga benshi mu rubyirugo baba batazi. Yavuze ko bishimira aho u Rwanda rugeze ndetse n’iterambere ryiyongera umunsi ku munsi.

Yagize ati “Cyera twajyaga tubyuka ijoro tujya kubaka amwe muri ariya mazu mu mujyi wa Kigali, nk’abageze mu zabukuru twishimira ko ibyo twatangiye abana bacu bari kubivugurura. Nubwo turi mu zabukuru tuzakomeza gutanga umusanzu wacu.”

Umuyobozi w’Akarere ka Nyarugenge wari waje kwifatanya n’aba bageze mu zabukuru nawe yashimangiye ko bagomba kugira uruhare mu mu gukemura amakimbirane. Yagize ati “Ntago bikwiye ko tuba tukibona imanza z’abana n’ababyeyi cyangwa abantu bo mu miryango, ibi biba bigomba gukemurwa namwe, mukagira abana banyu inama, ibibazo bigakemukira mu miryango bitagombye kugera ubwo abantu bicana.”

Gusa abageze mu zabukuru n’ubwo bahabwa izi nshingano bagaragaza ko bakeneye ubufasha bwihariye. Karangwa Vincent yagize ati “icyifuzo gikomeye ni uko abageze mu za bukuru twafashwa kwegerana n’ibyo bitekerezo byubaka dufite tukabona aho tubitangira”

Kugeza ubu abageze mu za bukuru bo mu murenge wa Kigali nibo bonyine mu gihugu bafite amatsinda bahuriramo. Aya matsinda ni atatu yakozwe ku bufasha bwa ‘Nsindangiza Organisation’; umuryango uharanira uburenganzira n’imibereho myiza y’abageze mu zabukuru.

Umuyobozi wa Nsindagiza, Elie Mugabowishema, avuga ko mu gihe cy’umwaka umwe bamaze bashinze uyu muryango basanze abageze mu zabukuru bafite ibibazo byihariye. Ibi byagaragajwe mu dukino n’imivugo yakinwaga n’abageze mu zabukuru, bagaragaza ko bakeneye gusindagizwa n’abakiri bato. Indwara nka rubagimpande, imigozi, kurwara amagufa, umutima n’umuvuduko w’amaraso utaretse n’ubuhumyi ni zimwe mu zibasha cyane abageze mu za bukuru.

Elie Mugabowishema avuga ko bakwiye kwitabwaho na Leta mu buryo bwihariye. Ati “Aba bantu ni ababyeyi bacu, imbaraga zabo bazikoresheje badukorera ibyo turi kwishimamo ubu. Bakeneye gusindagizwa, bagakurwa mu bwigunge.”
Umunsi mukuru w’abageze mu za bukuru mu Rwanda watangiye kwizihizwa mu 1996. Insanganyamatsiko y’uyu mwaka irasaba abageze mu zabukuru gutanga umusanzu wabo mu gukemura amakimbirane.