Itsinda ry’abagize Inteko Ishinga Amategeko umutwe wa Sena ya Congo Kinshasa, barasura bagenzi babo bagize Inteko Ishinga Amategeko umutwe wa Sena mu Rwanda mu gihe cy’iminsi itatu. Ibiganiro byabo bikazibanda ku bibazo byo gutsura umubano hagati y’ibihugu byombi.

Biteganijwe ko abo basenateri ba Congo bagera mu Rwanda ku wa 5 Gicurasi 2013, bakazasoza urugendo rwabo rw’akazi ku ya 8 Gicurasi 2013.

Ushinzwe itangazamkuru mu Nteko Ishinga Amategeko y’u Rwanda, Augustin Habimana yatangarije IGIHE ko abasenateri bazaza ari abagize Komisiyo y’Ububanyi n’Amahanga muri Sena ya Congo, bazaganira na bagenzi babo bagize Komisiyo y’Ububanyi n’Amahanga muri Sena y’u Rwanda.

Ibiganiro byabo bizibanda ku mubano w’ibihugu byombi, gushakira hamwe umuti w’ibibazo bwo mu karere cyane ibyo muri Congo, nyuma banasure inkambi y’impunzi z’abanyekongo iherereye i Gihembe. Aho abo basenateri bazareba imibereho y’impunzi z’abaturage babo, bakumva n’ibibazo bafite.

Habimana yagize ati “Tariki ya gatandatu bazirirwa mu biganiro na bagenzi babo bo mu Rwanda, nyuma ku itariki ya karindwi bazasure inkambi irimo abanyekongo i Gihembe mu karere ka Gicumbi.”

Abo basenateri bazaba bayobowe na Perezida wa Sena ya Congo, bazahura n’abandi bayobozi bakuru b’igihugu cy’ u Rwanda, barimo Perezida wa Sena y‘u Rwanda.

Ikindi kigambiriwe mu uru rugendo rw’iminsi itatu, ni ugutsura umubano hagati n’Inteko zishinga Amategeko imitwe ya Sena y’ibihugu byombi, kuko Sena zishobora kugira uruhare mu gukemura ibibazo by’Akarere.