Abahinzi n’aborozi bo mu Karere ka Kirehe bamurikiwe umushinga mushya witwa "Post Harvest and Agri-Busness Support Project", uje kubafasha mu kugabanya umusaruro ukomoka ku buhinzi n’ubworozi wangirikaga ungana na 30%.

Uyu mushinga ugamije gutunganya umusaruro ukomoka ku buhunzi n’ubworozi no guteza imbere ubuhinzi bw’umwuga uzibanda kbahinzi b’ibirayi, ibigori, ibishyimbo, imyumbati ndetse no gutunganya neza umusaruro w’amata.

Uyu mushinga ukazakorer mu turere 11 dutandukanye tw’igihugu aho hazakoreshwa amafaranga y’u Rwanda agera kuri miliyari 57 mu gihe cy’imyaka 5, abahinzi n’aborozi bakazakora imishinga yabo neza igamije guteza imbere ibikorwa byabo bazahabwa amafaranga binyuze mu bigo by’imari na za banki.

Abatuye Akarere ka Kirehe bavuga ko uyu mushinga uziye igihe dore ko bari bagifite inzitizi nyinshi zituma umusaruro wabo wangirika.

Biziyaremye uhagaririye abahinzi b’ibigori muri koperative Koasimu ikorera mu Murenge wa Musaza, avuga umusaruro wabo wangirika cyane kubera kutagira ubuhunikiro.

Yagize ati ”Ubusanzwe dufite sitoke ifite ubushobozi bwo kwakira toni 500, kandi mu gihembwe cy’ihinga tweza toni 1500, umusaruro tuwushyira hanze muri za shitingi kubera kubura aho tuwushyira imvura yagwa ukanyagirwa ndetse ukanangirika“.

Nyirahabineza Louise, ni umworozi afite inka za kijyambere eshanu avuga ko bahura n’ikibazo cyo kutagira aho kubika umusaruro ukomoka ku mata.

Yagize ati ”Ku munsi mbona litiro 20 z’ amata buri gitondo mfite umwana uyagemura muri centre y’aho dutuye agenda ayagurisha, rimwe na rimwe barayagura ndetse hari n’ubwo ayagarura mu rugo urumva rero ko biba ari ibihombo“.

Umuyobozi w’Akarere ka Kirehe wungirije ushinzwe ubukungu n’iterambere ry’ aka karere nawe yasabye abaturage kwitabira gukora imishinga itandukanye kugira ngo bateze imbere ibikorwa bakora.

Yagize ati "Aya ni amahirwe akomeye tutakwitesha, kuba musabwe gukora neza imishinga yanyu kandi twizeye neza ko uyu mushinga mu gihe uzamara uzafasha byinshi abahinzi n’aborozi bo muri aka karere".

Uyu mushinga uzakorera mu turere 11 tw’u Rwanda, uzakorana n’ingo 32.400 zo mu cyaro muri buri karere.