Iki gikorwa kizatatangizwa no gusura urwibutso rwa Ntarama rushyinguyemo imibiri irenga ibihumbi bitanu, gikomereze mu mudugudu w’abana b’imfubyi, aho abanyamuryango ba Cricket bazakina umukino n’abana batuye muri uwo mudugudu, nyuma bakazabubakira uturima tw’igikoni mu ngo mirongo itandatu zigize uwo mudugudu.

Si ibyo gusa kuko ishyirahamwe ry’umukino wa Cricket ryabageneye n’impano zirimo ibyo kurya, ibikoresho byo mu rugo n’imashini zogosha.

Charles Haba uhagarariye ishyirahamwe ryumukino wa Cricket “Ni iby’agaciro kuri twe kandi ni n’inshingano zacu kwifatanya n’abacitse ku icumu kuko bibafasha mu kwiyubaka no kumva ko batari bonyine mu buzima bwa buri munsi, twabageneye impano zitandukanye zirimo imashini zogosha zizabafasha mu mushinga bafite w’inzu itunganya umusatsi.”

Ndashimira abafatanyabikorwa bacu badufashije mu gutegura iki gikorwa cy’urukundo barimo Magasin Faruki, Sharma Super market, Simba Supermarket, Global s.a.r.l, ICM Agribusiness, Sulfo Rwanda, Robatics solutions, ndetse n’abanyamuryango ba Cricket muri rusange.

Iki gikorwa gitegurwa buri mwaka aho abayobozi, abanyamuryango abakinnyi n’abakunzi ba Cricket bajya kwifatanya n’abacitse ku icumu bo muri ako Karere mu rwego rwo kubakomeza no kubafata mu mugongo.