Abakozi ba Banki y’Abaturage bunamiye inzirakarengane za Jenoside zishyinguye i Kiziguro (Amafoto)

Yanditswe na Jean Pierre Tuyisenge
Kuya 14 Mata 2018 saa 08:58
Yasuwe :
0 0

Abakozi ba Banki y’Abaturage, BPR Atlas Mara, bunamiye Abatutsi bazize Jenoside bashyinguye ku Rwibutso rwa Jenoside rwa Kiziguro ruherereye mu Karere ka Gatsibo banaremera abayirokotse.

Kuri uyu wa Gatanu, tariki ya 13 Mata 2018, ubwo abakozi ba BPR Atlas Mara basuraga Urwibutso rwa Kiziguro, batambagijwe ibice birugize, basobanurirwa amateka y’ivangura yaranze ubuyobozi bubi yatumye u Rwanda rwibasirwa na Jenoside yakorewe Abatutsi.

Muri aka gace habereye ubwicanyi bw’indengakamere cyane cyane mu yahoze ari Komini Murambi ahari umwicanyi witwaga Gatete Jean Baptiste wayiyoboraga.

Umuyobozi Mukuru wa BPR Atlas Mara, Maurice K. Toroitich, yavuze ko bifuje gusura urwibutso rwa Jenoside rwa Kiziguro bagamije kwifatanya n’abandi Banyarwanda kwibuka Jenoside yakorewe Abatutsi no kuremera abayirokotse.

Yagize ati “Icyatumye tuza aha uyu munsi ni ukugira ngo twifatanye n’igihugu cyose kwibuka Jenoside yakorewe Abatutsi cyane ko iyi ari inshuro ya 24, ntitwifuje kujya mu biganiro gusa ahubwo twashatse no gutanga umusanzu wacu mu gufasha imiryango yarokotse Jenoside.”

Yavuze ko baje Kiziguro kubera ko hafite amateka yihariye ariko nka Banki yariho mu bihe bya Jenoside, bakaba ngo bashakaga kugira uruhare mu rugamba rwo kubaka u Rwanda.

BPR Atlas Mara yatanze miliyoni ebyiri z’amafaranga y’u Rwanda azafasha mu kuvugurura urwo rwibutso n’izindi miliyoni esheshatu zizakoreshwa mu kugurira imiryango 15 ibikoresho byo mu nzu yamaze kubakirwa.

Umuyobozi w’Akarere ka Gatsibo wungirije Ushinzwe Iterambere ry’Ubukungu, Manzi Théogène, yashimiye BPR Atlas Mara umwanya yafashe ikunamira abazize Jenoside ariko nanone ikaba yateye inkunga imiryango yarokotse.

Yagize ati “Jenoside yasenye byinshi ku bukungu bw’igihugu ndetse na Banki y’Abaturage nayo irasenyuka kuko yabuze abantu b’ingirakamaro ariko ntiyahezeyo kuko yariyubatse ndetse iy’ubu ntaho ihuriye n’iya mbere ya Jenoside, ikaba inafasha mu kubaka u Rwanda.”

Yakomeje agira ati “Kuba baje hano bihesheje icyubahiro cyane ko bagize inkunga basiga, izafasha abarokotse Jenoside bashobore kwiteza imbere.”

Abaharokokeye bavuga ko Urwibutso rwa Kiziguro rufite amateka yihariye kuko Interahamwe ngo zazaga zigasanga mu Kiliziya Abatutsi babaga bahihishe zikabica zikajya kubajugunya mu rwobo ruri mu bice bigize urwo rwibutso.

Urwibutso rwa Kiziguro rwubatse mu gace kahoze ari Komini Murambi yayoborwaga na Gatete Jean Baptiste wagize uruhare runini mu kwica Abatutsi. Gatete yakatiwe n’Urukiko Mpuzamahanga Mpanabyaha rwa Arusha, igifungo cy’imyaka 40.

Uru rwibutso rushyinguyemo imibiri isaga ibihumbi 14 y’abazize Jenoside yakorewe Abatutsi bagiye bicirwa hirya no hino muri Komini zahoze ari Murambi, Muhura, Gituza na Ngarama, ubu ni mu Karere ka Gatsibo.

Aharuhukiye imibiri isaga ibihumbi 14 y’abazize Jenoside yakorewe Abatutsi
Hasomwe amazina y'abari abakozi ba BPR Atlas Mara bazize Jenoside yakorewe Abatutsi mu 1994
Abakozi ba BPR Atlas Mara bashyize indabo ku mva zishyinguyemo imibiri y'abazize Jenoside i Kiziguro
Imiryango y'abari abakozi ba BPR Atlas Mara yashyize indabo ku mva zishyinguyemo imibiri y'abazize Jenoside
Umuyobozi Mukuru wa BPR Atlas Mara, Maurice K. Toroitich n'uw’Akarere ka Gatsibo wungirije Ushinzwe Iterambere ry’Ubukungu, Manzi Théogène, bashyira indabo ku mva zishyinguyemo abazize Jenoside i Kiziguro
Hacanwe urumuri rw'icyizere cy'ahazaza h'Abanyarwanda
Umuyobozi Mukuru wa BPR Atlas Mara, Maurice K. Toroitich, yavuze ko bifuje gusura urwibutso rwa Jenoside rwa Kiziguro mu kwifatanya n’Abanyarwanda kwibuka Jenoside yakorewe Abatutsi
Umuyobozi w’Akarere ka Gatsibo wungirije Ushinzwe Iterambere ry’Ubukungu, Manzi Théogène, yashimiye BPR Atlas Mara yaremeye imiryango y'abarokotse Jenoside
BPR Atlas Mara yatanze sheke ya miliyoni esheshatu yo gufasha abarokotse Jenoside
BPR Atlas Mara yatanze miliyoni ebyiri zo gusana Urwibutso rwa Kiziguro

Kanda hano urebe andi mafoto menshi

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .