Kuri uyu wa Gatatu bahuriye mu gikorwa cyo Kwibuka, aho basuye Urwibutso rwa Jenoside yakorewe Abatutsi rwa Kigali, ruri ku Gisozi.

Umuyobozi uhagarariye abashoye imari muri Legacy Clinics, Kalima Jean Malic, yasabye abakozi bari bahagarariye abandi guharanira kwiga no kumenya amateka byimbitse, cyane ko abakozi b’iri vuriro barimo urubyiruko rwavutse nyuma ya Jenoside.

Yavuze ko kuba mu 1994 hari abaganga biyambuye inshingano bakavutsa ubuzima abo bagombaga kuvura, bitanga amasomo ko buri wese akwiye guharanira kuzuza inshingano zo kuvura no kubungabunga ubuzima.

Ati "Birumvikana ko abaganga bagize uruhare muri Jenoside yakorewe abatutsi bari bataye inshingano zabo zo kuvura. Ntabwo nabona amagambo nkoresha ku muganga nk’uwo, gusa mbona nta mutima yari agifite."

Mu kiganiro cyatanzwe n’Impuguke ishinzwe ibikorwa by’Ubukangurambaga muri Minisiteri y’Ubumwe bw’Abanyarwanda n’Inshingano Mboneragihugu, Philippe Mpayimana, yagarutse ku mateka mabi u Rwanda rwanyuzemo n’intambwe imaze guterwa nyuma y’imyaka 28 Jenoside yakorewe Abatutsi ihagaritswe.

Umuyobozi Nshingwabikorwa w’Akarere ka Kicukiro, Umutesi Solange, yasabye aba bakozi gukomeza guhangana n’abagishaka guhakana ko Jenoside yakorewe abatutsi yabaye kandi hari ibihamya bibigaragaza.

Yanabashishikarije kurwanya ingengabitekerezo y’uburyo bwose, ahubwo bagaharanira kubaka u Rwanda rushya ruzira amacakubiri.

Umukozi wari uhagarariye Ibuka muri iki gikorwa, Ngombwa Christian, yagarutse ku buzima bw’urwango Abanyarwanda babanje kubibwamo kugira ngo umugambi wo gutsemba Abatutsi uzagerweho, n’ubunyamaswa bwaranze bamwe mu bari abaganga mu gihe cya Jenoside.

Yasabye aba baganga gutanga umusanzu wabo mu kurwanya abapfobya Jenoside yakorewe Abatutsi bifashishije inzira z’ikoranabuhanga, nka bumwe mu bwifashishwa n’abakwiza ingengabitekerezo ya Jenoside yakorewe abatutsi no kuyipfobya.

Ubushakashatsi bwakozwe n’iyari Komisiyo y’Igihugu ishinzwe gukumira no kurwanya Jenoside mu Rwanda CNLG, bwagaragaje ko mu 1994 hari abaganga bijanditse muri Jenoside yakorewe abatutsi bica abarwayi batibagiwe n’abo bakoranaga umurimo w’ubuvuzi.

Muri abo harimo Dr Nshimyumuremyi Jean Berchmans wahoze ari umwarimu muri Kaminuza Nkuru y’u Rwanda, Dr Nshimiyumukiza Jotham wayoboraga ibitaro bya CHUB i Butare, Dr Munyemana ndetse n’abandi batandukanye.

Legacy Clinics ifite abaganga 53 b’inzobere mu nzego zitandukanye.

Abayigana bagera ku bihumbi 30 buri kwezi barimo Abanyarwanda, abanyamahanga baba mu Rwanda n’abaturuka mu Karere u Rwanda ruherereyemo.

Umuyobozi uhagarariye abashoye imari muri Legacy Clinics, Kalima Jean Malic, hamwe n'abakozi b'iri vuriro bunamira abazize Jenoside

Beretswe uko Jenoside yateguwe, igashyirwa mu bikorwa, n'uko yahagaritswe

Basobanuriwe amateka y'u Rwanda, mu Rwibutso rwa Jenoside rwa Kigali

Abakozi ba Legacy Clinics biyemeje kurushaho kwita ku nshingano zabo zo kurengera ubuzima

Umuyobozi Nshingwabikorwa w'Akarere ka Kicukiro, Umutesi Solange, yasabye abaganga kurwanya ingengabitekerezo ya jenoside

Mpayimana Philippe yatanze ikiganiro cyagarutse ku mateka mabi u Rwanda rwagize

Komiseri muri Ibuka, Ngombwa Christian, yavuze ko abaganga bakwiye kurinda inshingano zikomeye bafite

Kalima yashimye abakozi ba Legacy Clinics, abasaba gukomereza mu mujyo wo kuzuza inshingano zo kurinda ubuzima

Kabasenga Claudine yasangije bagenzi be ubuhamya bw'ibyo yaciyemo muri Jenoside

Amafoto: Rwema Derrick