Nyuma y’uko abamotari bakomorewe bakongera gusubira mu bikorwa byo gutwara abagenzi, hari aho batubahiriza amabwiriza yo kwirinda COVID-19 iterwa n’agakoko ka Coronavirus kuko usanga hari abadakarabya abagenzi na alcohol mbere yo kubatwara ndetse na casques zabo ntibaziteremo umuti nk’uko babitegetswe.
Iyo utembereye i Huye muri ibi bihe ubona abamotari benshi batwaye abantu ariko casques z’abo bagenzi ziriho ibirahure.
Abagenzi bavuga ko biteye impungenge kuko ari bimwe mu byakwirakwiza Coronavirus bityo hakwiye ingamba zihariye.
Umwe mu bagenzi ati “I Huye wagira ngo ni mu kindi gihugu kitari u Rwanda; abamotari ntabwo bubahiriza amabwiriza yo kwirinda Coronavirus kuko baha umugenzi casque iriho ikirahure.”
Undi mugenzi we yasabye ko inzego zibishinzwe zagira icyo zikora byihuse zitarindiriye ko icyorezo kigera i Huye.
Ati “Si ukuvuga ko abayobozi n’abapolisi batabibona ahubwo ni uko batabyitaho. Muri uyu Mujyi wa Butare nta mumotari n’umwe wakuyeho ikirahure kuri casque y’umugenzi.”
Bamwe mu bamotari bo mu Mujyi wa Huye baganiriye na IGIHE bavuga ko mu Karere ka Huye batigeze basabwa gukura ikirahure kuri casque y’umugenzi ariko bakibaza impamvu bagenzi babo bo mu Mujyi wa Kigali babisabwe bo bagahabwa umwihariko.
Hari uwagize ati “Reba twese ntabwo ibirahure twabikuyeho kuko hano i Butare ntabwo Polisi yabidusabye. Njyewe nigeze kugikuraho nibwirije ariko (Casque) nayiha abagenzi bakayanga ngo baratinya umuyaga, ubwo ngisubizaho. Abapolisi nabo iyo bateze moto bambaye n’imyenda y’akazi, casque turazibaha bakazambara kandi ziriho ibirahure.”
Undi mumotari yavuze ko bagenzi be bakorera i Kigali bakuye ibirahure kuri casques z’abagenzi kandi ufashwe yabirenzeho ahanwa.
Ati “Ahandi birubahirizwa, hari mugenzi wanjye ukorera i Kigali yambwiye ko iyo bagufashe wambitse umugenzi casque iriho ikirahure bahita baguca amande y’ibihumbi 25 Frw y’agasuzuguro. I Huye ho ntabwo babyitaho.”
Abamotari b’i Huye bahuriza ku kuba inzego zibishinzwe zabyitaho zikabategeka bose gukura ibirahure kuri casques z’abagenzi kuko nabo bemeza ko biteye impungenge ndetse bishobora gukwirakwiza Coronavirus. Gusa muri uwo mujyi hari bamwe mu bamotari bafite casques z’abagenzi zakuweho ibirahure bavuga ko bakikoze mu rwego rwo gukumira ikwirakwira rya Coronavirus.
Urwego Ngenzuramikorere, RURA, rwasabye abamotari bose kubahiriza amabwiriza yose yashyizweho agamije gukumira ikwirakwira rya COVID-19 arimo no gukuraho ibirahure kuri casques z’abagenzi.
Umuyobozi w’Ishami rigenzura Serivisi zo gutwara abantu n’ibintu muri RURA, Anthony Kulamba, yabwiye IGIHE ko abamotari batakuyeho ibirahure kuri casques z’abagenzi bakora amakosa.
Ati “Abagifite ibirahure kuri casques z’abagenzi icyo twabasaba ni ukubikiraho kuko twabwiye abamotari ko akarahure bagakuraho kuri casque umugenzi akoresha kuko n’ahandi niko bimeze kandi uwagira urujijo yaduhamagara.”
Yakomeje avuga ko gukuraho ikirahure kuri casque y’umugenzi ari amabwiriza yatanzwe bityo agomba kubahirizwa kuko ikigamijwe ari ukwirinda icyorezo.
Yasabye abamotari n’abagenzi batega moto kwita ku kubahiriza amabwiriza yo kwirinda COVID-19 bambara agapfukamunwa, bakaraba intoki na alcohol cyangwa amazi meza n’isabune kandi batera n’umuti muri casque mbere yo kuyambara kandi imbere yayo bakabanzamo igitambaro.
Kuri uyu wa Kabiri, mu butumwa RURA yanyujije kuri Twitter nyuma yo kubazwa n’umugenzi impamvu hari abamotari batakuye ibirahure kuri casques z’abagenzi yavuze ko ayo ari amakosa.
Yagize iti “Gukuraho ikirahure cya casque y’umugenzi bireba abamotari bose. Dufatanyije na Koperative y’abamotari Ferwacotamo na Polisi y’Igihugu turakomeza gukangurira abamotari kubahiriza amabwiriza yashyizweho agamije kwirinda ikwirakwira rya COVID-19.”
Abagenzi batega moto mu Karere ka Huye bagaragaje izi mpungenge z’uko abamotari batakuye ibirahure kuri casques babambika nyuma y’uko Minisiteri y’Ubuzima itangaje ko mu bantu bashya bagaragayeho ubwandu bwa COVID-19 ku wa 21 Kamena 2020 harimo abamotari babiri bo mu Mujyi wa Kigali.
Ibitekerezo 0