Abanyamuryango ba FPR Inkotanyi bo mu kigo cy’igihugu cy’iterambere (RDB) bashyikirije ku mugaragaro iduka ryatwaye miliyoni eshatu (3,000,000) abamugariye ku rugamba bo mu murenge wa Nyarugunga, mu rwego rwo gukomeza kubafasha kwiteza imbere no kwigira.

Umuyobozi ushinzwe imari muri RDB Mark Nkurunziza yagize ati “Twishimiye kubaha ku mugaragaro iri duka, abanyamuryango ba FPR mu kigo cy’igihugu cy’iterambere babahaye mukuzikenura. Duhora tuzirikana uruhare rwanyu mu kubohora Igihugu, uruhare ingabo zigira mu kubungabunga amahoro n’umutekano.”

Uwitonze Jeanne d’Arc ukuriye abanyamuryango ba FPR Inkotanyi muri RDB yagize ati “Iki gikorwa ni gito ariko bidufasha gutanga ubutumwa mu bandi banyamuryango bo mu bindi bigo bitandukanye.”

Brig. Gen Bagabo umwe mu ba Komiseri ba Komisiyo yo gusubiza mu buzima busanzwe ingabo zavuye ku rugerero (NCD) ishami rishinzwe guha amacumbi abamugariye ku rugerero yagize ati “urashima RDB igikorwa cyiza cyo gutera inkunga abamugariye ku rugamba,…uru ni urugamba rugikomeza rwo kubohora igihugu cyacu ntirurangira, ni urugamba rwo kubaho, mu muco nyarwanda gufasha ni umuco mwiza ukwiye guhoraho.”

Umuyobozi w’Akarere ka Kicukiro Paul Jules Ndamage, yavuze ko iki gikorwa ari icyo gushimirwa mu rwego rwo kubafasha kwigira, avuga ko akarere kazakomeza gufasha no kuba hafi aba bamugariye ku rugerero bo muri uyu mudugudu hamwe no muyindi midugudu.

Imiryango 16 y’abamugariye ku rugerero iba mu mugudu wa Kibaya, akagari ka Kamashashi mu murenge wa Nyarugunga mu karere ka Kicukiro ni yo yahawe iri duka.