Abikorera, abanyapolitike n’abavuka i Rubavu batandukanye baba mu mujyi wa Kigali bakusanyije miliyoni 11.78 mu rwego rwo gukusanya amafaranga yo kubaka urwibutso rw’abazize Jenoside yakorewe Abatutsi mu Karere ka Rubavu.
Iki gikorwa cyo gushaka uko hazubakwa urwibutso cyabereye mu mujyi wa Kigali, kuwa 19 Mata 2014. Urwo rwibutso ruzashyingurwamo imibiri y’Abatutsi bazize Jenoside, ruzaba rurimo amateka ya Jenoside mu cyahoze ari Gisenyi.
Minisitiri w’Ingabo, Gen James Kabarebe wari witabiriye iki gikorwa, yashimye abacyitabiriye n’abagiteguye.
Yagize ati”Impamvu z’iki gikorwa zirivugira ubwazo, gitandukanye n’ibindi bikorwa bijya biduhuza mu Karere ka Rubavu, gitandukanye no guhura muvuga ku iterambere ry’Akarere ka Rubavu.”
Abatakiriho bakwiye kubahwa
Gen Kabarebe yakomeje agaragaza ko icyo gikorwa gifite umusanzu ukomeye mu kwibuka jenoside yakorewe Ababtutsi, ati “Kiratanga ubutumwa ku bariho, ariko kigatanga n’ubutumwa ku rubyiruko, kubera ko abana bacu iyo babona imibiri y’abantu iri ahantu hasuzuguritse hatameze neza, nabo mu mitwe yabo bumva ko abishwe nta gaciro bari bafite, bari bakwiye gupfa, ariko iyo babonye aho bari hameze neza bubashywe, bazumva ko bariya bantu bari bafite agaciro.”
Guverineri w’Intara y’Uburengerazuba, Caritas Mukandasira, yavuze ko gushyingura mu cyubahiro mu rwibutso ari ugusubiza icyubahiro Abatutsi bishwe muri Jenoside.
Yagize ati “Twebwe abasigaye ni inshingano zacu, ngo tugire bicye tubakorera, ibyo bicye rero ni ukubasubiza icyubahiro bambuwe igihe bicwaga bazira uko bavutse, tubashyingura mu cyubahiro.”
Umuyobozi w’Akarere ka Rubavu, Sheikh Bahame Hassan,yavuze ko hakiri imibiri itarashobora gushyingurwa uko bikwiye.
Yagize ati “Muri iyo mibiri twavuga abajugunywe n’abiciwe ahazwi nka komine “Rouge”[itukura] mu Murenge wa Gisenyi, Akarere ka Rubavu. Twateganyije kuzubaka urwibutso rufite agaciro ka 149.355.860 frw, Akarere ka Rubavu twari twarageneye iki gikorwa miliyoni 20, nyuma yaho tuza kongeraho izindi miliyoni umunani, iyo urebye na ziriya miliyoni 51 zamaze gukoreshwa harimo miliyoni 28 z’Akarere ka Rubavu, andi yose atangwa n’abaturage nk’uko mwabonye barimo kuyatanga aha ngaha.”
Amateka y’icyobo cya Komini “Rouge”
Mahame yagize ati “Amateka ya hariya hantu ni maremare cyane niyo tuganiriye n’abasaza barutubwira bati” guhera mu 1963, iyo batemaga abantu babajyanaga hariya kuko n’ubusanzwe hari amarimbi, ari abanyapolitike babajyanaga hariya, ari igeragezwa ry’Abagongwe ni hariya babajyanaga, ari abantu biciwe muri za Kibirira babavanaga Kibirira bakabazana hariya.”
Yakomeza avuga ko nta mibare inzwi neza y’abantu bari mu cyobo cya komine Rouge, ati “Tubara ibantu ibihumbi bitanu, ariko imibare irarenga, duhereye muri za 63, hari n’abandi tutaramenya n’aho babashyize, ubu turimo kwigisha abantu kugirango batwereke aho babashyize nibiba na ngombwa tubashyingurire rimwe.”
Inyito Komine y’umutuku (Rouge)yavuye he?
Sheikh Bahame yatangarije IGIHE ko umusaza wiciwe kuri urwo rwobo ariwe wasize ahise iri zina.
Yagize Ati” Ni umusaza abantu benshi baramuzi, yakundaga abantu yitwaga Rugotomezi yakoraga muri Bralirwa ariko yari yaramaze kujya mu kiruhuko cy’izabukuru, yari n’umufana ukomeye cyane w’ikipe ya Rayon Sports. Baje kumufata bati turaje tukujyane kuri Komini, ati”Jyewe ndi umuntu uzwi hano na Burugumesitiri turaziranye, muze tugende. Bakihagera icya mbere yabonye yabonye intumbi, yabonye amaraso, hari n’ibiti bibiri bazirikagaho abantu mbere yo kubica, hari n’ikibuye baryamishagaho abantu bakabica. Umusaza Rugotomezi amaze kubona ibyo byose nibwo yavugaga ati”Ntabwo ari kuri komine, ahubwo ni Komine Rouge.”
Akarere ka Rubavu katangaje ko hari imirimo yihutirwa isigaje gukorwa kugira ngo uru rwibutso ruzashingurwemo imibiri iri muri komine rouge n’ahandi hatandukanye mu kwezi kwa Kamena 2014. Imirimo yihutirwa ikaba ifite agaciro ka miliyoni 29.3. Gasaba abaturage bo mu Karere ka Rubavu n’abandi Banyarwanda uko bifite gutanga inkunga yabo kuri konti nomero 01331002013/Rwf, iri muri Banki ya COGEBANQUE.
TANGA IGITEKEREZO