Mu kiganiro ku kigero cy’itangazamakuru mu Rwanda cyatanzwe mu nama mpuzamahanga kuri Demokarasi muri Afurika, Aziya n’u Burasirazuba bwo hagati, abanyamakuru bo mu Rwanda batunzwe agatoki kudakora umwuga wabo uko bikwiye ahubwo bagashyira imbere gushaka amafaranga.

Ikiganiro cyatanzwe n’impuguke Dr. Kayumba Christopher umwarimu mu ishuri ry’itangazamakuru n’itumanaho muri Kaminuza y’u Rwanda, Jeneral Ulimwengu, Gerard Mbanda ushinzwe itangazamakuru mu kigo cy’igihugu cy’imiyoborere (RGB) na Dr. Tim Gallimore bashimangiye ko imikorere y’itangazamakuru igifite byinshi byo kwiga bihereye mu bakora uyu mwuga.

Dr. Kayumba Christopher umwarimu mu ishuri ry’itangazamakuru n’itumanamuri muri Kaminuza y’u Rwanda, yavuze ko abanyamakuru ubwabo bafite ikibazo cyo kutagira ubushake bwo kumenya ahubwo bakarazwa ishinga no gushaka amafaranga mbere yo gutanga umusaruro.

Dr. Kayumba yagize ati “Abanyamakuru benshi bajya mu mahugurwa batagiye gushaka ubumenyi ahubwo bagiye gushaka amafaranga ya transport.”

Dr. Kayumba yakomeje avuga ko umwuga w’itangazamakuru usaba ubwenge buhanitse atari ikintu cyo gufata uko wishakiye.

Dr. Tim Gallimore we yavuze ku bwisanzure bw’itangazamakuru aho yashimangiye ko uburenganzira bw’itangazamakuru bukwiye kwiganwa ubushishozi bigendeye ahanini ko abanyamakuru benshi bumva ko umunyamakuru aba yakoze neza iyo yavuze ibitagenda gusa.

Yagize ati “Itangazamakuru ry’umwuga ni irifata impande zombi".

Ubwisanzure bw’itangazamakuru bwatinzweho muri iki kiganiro kuko ngo iki ari ikintu cyo kwigwaho no kwitondera.

Mbanda Gerald ushinzwe ibikorwa by’itangazamakuru mu Kigo cy’igihugu gishinzwe imiyoborere (RGB), yasobanuye ko Itangazamakuru mu Rwanda ryahawe ububasha bwo kwigenzura, ariko ko risabwa kumenya aho rigarukira kugira ngo ritabiba amacakubiri mu benegihugu, nk’uko radio ya RTLM yabigenje muri Jenoside yakorewe Abatutsi.

Gusa itangazamakuru mu Rwanda ngo hari intambwe rimaze gutera n’ubwo rigifite byinshi byo gukora. Nk’uko byagaragajwe n’ikigo cy’igihugu cy’imiyoborere myiza (RGB),itangazamakuru ryo mu Rwanda rimaze gutera imbere ku kigero gisaga 60% nk’uko ubushakashatsi bwakozwe mu mwaka 2012 bubigaragaza.

Guhera mu mwaka wa 2012 ngo hari amategeko yagiye ashyirwaho kugirango abanyamakuru babashe kugira ubwisanzure birimo gushyiraho urwego rw’abanyamakuru bigenzura (RMC), ibi byose bigaragaza ko hari ubushake leta ifite bwo kugirango itangazamakuru rikomeze gutera imbere.

Abajijwe niba itegeko rigenga itangazamakuru mu Rwanda ryaba rifite uruhare runini ku gukomeza kwica uwo mwuga bitewe n’abantu baryinjiramo batararyize, Mbanda yasubije ko atari ko bimeze kuko Umuyobozi w’ikinyamakuru asabwa kuba afite umwanditsi mukuru wize itangazamakuru (editor).

Ku bwa Mbanda ngo abona nta cyo itegeko rigenga itangazamakuru mu Rwanda ryica.

[email protected]