Abari gutanga umusanzu mu buvuzi ni inzobera mu bijyanye no gutera ikinya, kubaga, ubuzima bwo mu mutwe, indwara z’umutima, ubugororangingo, indwara z’abagore, indwara z’amenyo n’izindi mu bitaro 11 by’intara n’uturere.

Uretse abazatanga serivizi z’ubuvuzi hari n’abandi bazakora mu guhugura abarimu bigisha amasomo y’imyuga n’ubumenyingiro binyuze mu Ishuri Rikuru ry’u Rwanda ry’Imyuga n’Ubumenyingiro (Rwanda Polytechnic) mu mashami yaryo uko ari umunani (IPRCs).

Ibi biri muri gahunda ya Guverinoma y’u Rwanda ifatanyijemo n’Umuryango Mpuzamahanga wita ku Bimukira (IOM) igamije gufasha Abanyarwanda gutanga umusanzu mu nzego zitandukanye zirimo ubuvuzi no guteza imbere tekinike, imyuga n’ubumenyingiro mu gihugu cyabo.

Biteganyijwe ko bazakomeza gutanga umusanzu mu bitaro bya Kabgayi, Kibuye, Bushenge, Murunda, Gisenyi, Ruhengeri, Butaro, Kibungo, Nyagatare, Kibagabaga na Ndera uko bagenda bitabira iyi gahunda.

Kuva iyi gahunda yatangira abagera kuri 25 baturutse i Burayi baje mu Rwanda gutanga umusanzu mu masomo ajyanye n’ubumenyingiro n’ubuvuzi.

Umunyamabanga Uhoraho muri Minisiteri y’Ububanyi n’Amahanga n’Ubutwererane, Mukeka Clementine, yagaragaje ko Abanyarwanda baba mu mahanga bakomeje gutanga umusanzu mu kubaka igihugu kandi bitanga icyizere ku ruhare rwa buri wese mu cyerekezo ruganamo.

Ati “Guverinoma y’u Rwanda, mu cyerekezo cyayo cya 2050, ishyize imbere kubaka ubukungu bushingiye ku bumenyi. Kuva aho uyu mushinga utangiriye, Abanyarwanda baba mu mahanga bagize uruhare rukomeye mu iterambere ry’Igihugu nko mu burezi, ubuvuzi n’ikoranabuhanga.”

Yakomeje asaba ababa mu mahanga guhoza Igihugu cyabo ku mutima, bagashyigikira gahunda z’iterambere binyuze gusangira ubumenyi, ubunararibonye bavoma ahandi bukifashishwa mu guteza imbere igihugu cyababyaye.

Imibare ya Banki Nkuru y’u Rwanda (BNR) igaragaza ko mu myaka itandatu ishize, Abanyarwanda baba mu mahanga binjirije Igihugu asaga miliyari 1,100 Frw.

Umunyarwanda utuye mu Bubiligi akaba n’inzobere ku bibazo by’ubuzima bwo mu mutwe, Asangwe Emeritha, amaze imyaka 12 akorera mu bitaro bya Centre Ados i Bruxelles, muri Nyakanga uyu mwaka yahisemo gufatira ikiruhuko i mu Rwanda asangiza abakora muri urwo rwego ubumenyi mu bitaro bivura indwara zo mu mutwe bya Ndera mu Karere ka Gasabo.

Mu kiganiro na IGIHE yavuze ko umusanzu yatanze mu Rwanda ari kimwe mu bintu byamushimishije mu buzima kuko ari bumwe mu buryo bwo kubaka igihugu.

Ati“Kuza gutanga umusanzu ku gihugu cyacu biradufasha cyane kuko hari ubumenyi dusigira abandi. Natwe tuba twiga umuco n’imikorere byo mu Rwanda. Nize ibintu byinshi kandi byaramfashije. ”

Kayiganwa Olivier atuye mu Bubiligi akaba inzobere mu bijyanye n’ibikorwaremezo n’ikoranabuhanga n’amashanyarazi ndetse akora mu kigo cya Smals ICT for Society-Data Center Management muri iki gihugu; yagaraje ko yatanze umusanzu ufatika kandi witezweho byinshi.

Ati “Natanze amahugurwa ku ikoreshwa rya porogaramu ya mudasobwa yifashishwa mu gutanga umuriro kandi nsize abo nahuguye bamaze gusobanukirwa kuyikoresha. Ibi bizazana impinduka nziza kandi nanjye hari ibyo nahigiye.”

Yasabye abandi gukora uko bashoboye bakigomwa igihe gito bashobora kubona mu gusangiza u Rwanda ubumenyi bavomye mu mahanga mu kuruteza imbere.

Umunyamabanga Nshingwabikorwa w’Ikigo Gishinzwe Imyigishirize y’Abakozi bo mu Rwego rw’Ubuzima (HRHS), Dr Ndimubanzi Patrick, yagaraje ko ari gahunda nziza yatangijwe kandi ko yitezweho byinshi.

Yakomeje ati “Turashishikariza Abanyarwanda b’inzobere mu by’ubuvuzi baba mu mahanga kuza mu gihugu kwigisha abakozi bo kwa muganga no kuvura abarwayi.”

Umuyobozi Mukuru w’Ishuri Rikuru ry’u Rwanda ry’Imyuga n’Ubumenyingiro
Dr Sylvie Mucyo, yagagaje ko uyu mushinga wa “Diaspora Engagement in Tvet Sector” ugiye kuba igisubizo mu ishyirwa mu bikorwa rya gahunda yo kuzamurira mwarimu ubushobozi.

Ati “Abanyarwanda baba mu mahanga batanga ubumenyi, cyane cyane butamenyerewe ku isoko ryacu, binyuze mu mahugurwa y’igihe gito ahabwa abazahugura abandi (Training of trainers). Turashimira cyane Leta y’u Rwanda yatekereje ikanashyira mu bikorwa uyu mushinga, turashimira abaterankunga b’uyu mushinga barimo International Organization for Migration n’abandi.”

Abanyarwanda baba mu mahanga basanzwe bagira uruhare muri gahunda zitandukanye z’iterambere ry’Igihugu nko guhererekanya ubumenyi, gutanga inkunga mu bwisungane mu kwivuza, Cana Challenge, Connect Rwanda Challenge, Ejo Heza n’izindi.

Umunyarwanda uri mu mahanga akaba ashaka gutanga umusanzu we muri iyi gahunda yakwiyandikisha akoresheje uyu murongo, bitarenze kanama 2023 ku bo muri TVET https://www.idiaspora.org/en/opportunities/technical-and-vocational-education-and-training-tvet
cyangwa mu rwego rw’ubuvuzi https://www.idiaspora.org/en/opportunity/professionals-health-sector

Inzobere mu buvuzi bw'indwara zo mu mutwe Asangwe Emeritha amaze imyaka irenga 12 akorera i Bruxelles mu Bubiligi

Kayiganwa Olivier utuye mu Bubiligi akaba inzobere mu bijyanye n'ikoranabuhanga n'ibikorwaremezo

Umunyamabanga Uhoraho muri Minisiteri y'Ububanyi n'Amahanga n'Ubutwererane, Mukeka Clementine yashishikarije Abanyarwand agukomeza kwitabira iyi gahunda

Umuyobozi Mukuru w'Ishuri Rikuru ry'Ubumenyingiro, RP, Dr Sylvie Mucyi yagaragaje ko uyu mushinga witezweho umusaruro