Abanyarwanda bagera ku bihumbi 120 barwaye amaso ashobora kubatera ubuhumyi

Yanditswe na Prudence Kwizera
Kuya 11 Ukwakira 2019 saa 09:12
Yasuwe :
0 0

Imibare igaragaza ko mu Rwanda abaturage bagera ku bihumbi 120 bagana na 1% by’abenegihugu bafite uburwayi bw’amaso bushobora kubatera ubuhumyi, mu gihe ku Isi yose basaga miliyoni 250.

Byatangajwe ubwo hizihizwaga umunsi mpuzamahanga wo kurwanya ubuhimyi kuri uyu wa Kane tariki ya 10 Ukwakira 2019.

Mu kuwizihiza abaturage basuzumwe amaso ku buntu bahabwa n’ubuvuzi bakoresheje ikarita y’ubwisungane mu kwivuza berekwa n’indorerwamo bashobora kwigurira ku mafaranga 5 000 Frw.

Icyo gikorwa cyakozwe n’abaganga b’inzobere bo ku Bitaro bya Kaminuza bya Butare, CHUB, ku bufatanye n’Umuryango One Sight, aho basanze abaturage mu Murenge wa Huye.

Umuyobozi Mukuru wa CHUB, Dr Sendegeya Augustin, yavuze ko babikoze mu rwego rwo kwegereza abaturage serivisi z’ubuvuzi no kubagira inama z’uko bakwirinda ubuhumyi.

Ati “Ni igikorwa kimwe muri byinshi dukora kugira ngo twegereze ubuvuzi abaturage aho batuye; ni igikorwa dukora nibura kabiri mu mwaka.”

Dr Sendegeya yasobanuye ko impamvu nyinshi zitera uburwayi bw’amaso zishobora kwirindwa. Gusa ngo n’uburwayi bw’amaso bwinshi buravurwa bugakira igihe ubufite yivuje neza bikamurinda ingorane zo guhura n’ubuhumyi.

Ati “Ariko icyiza kirimo ni uko ibitera ibibazo byo kutabona neza ibyinshi byirindwa; nk’abageze mu za bukuru bagira ikibazo cy’ishaza iyo bivuje ishaza turikuramo bakongera kureba neza.”

Abafite amaso atukuye n’abafite abarya bakayabyiringira basabwe kuyivuza hakiri kare kugira ngo bitazabakururira ubuhumyi.

Bamwe mu baturage basuzumwe banavurwa amaso bagaragaje ko kwegerezwa iyo serivise bari babikeneye kuko guhabwa uruhushya rwo guhura n’inzobere bisanzwe bibagora.

Karangwa Jean Damascène waje kwivuza azanye n’umwana we w’imyaka itanu yavuze ko bombi bamaze igihe amaso abarya bakayabyiringira ariko bizeye ko bagiye gukira kuko bavuwe.

Ati “Baradusuzumye baduha n’imiti; ubu ndizera ko tugiye gukira amaso kuko yaturyaga cyane.”

Uretse abandikirwa imiti ijyanye n’uko barwaye amaso, hari n’abari kwandikirwa indorerwamo z’amaso bahita bagura.

Abana bafite ibibazo by'amaso na bo bazanwe kwisuzumisha no kwivuza
Bamwe mu baturage bo mu Murenge wa Huye baje kwisuzumisha no kwivuza amaso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza