Abapolisi bakuru 52 baturutse mu bice binyuranye by’igihugu, bari mu masomo y’ikarishyabwenge mu gufatanya n’abaturage mu gucunga umutekano. Ayo masomo agomba kumara iminsi ibiri, yatangiye kuwa 12 Kanama 2013.

Ubufatanye n’abaturage mu gucunga umutekano ni gahunda ya Polisi y’igihugu, mu rwego rwo kurwanya no gukumira ibyaha ndetse no kubafasha kwikemurira ibindi bibazo, bijyanye n’umutekano aho batuye.

Nk’uko urubuga rwa Polisi y’igihugu dukesha iyi nkuru rubigaragaza, Abapolisi bakuru bitabiriye ayo masomo y’ikarishyabwenge mu gufatanya n’abaturage gucunga umutekano, barimo abakorera mu turere (DCLOs: District Community Liaison Officers) hakiyongeraho abandi 20 bashinzwe imenyekanisha n’ubufatanye n’abaturage mu gucunga umutekano.

Aya masomo aribanda ku isura ya Polisi y’Igihugu no kwakira abayigana, igenamigambi n’imikorere no kurebera hamwe muri rusange ibijyanye n’Ikigo Isange gikorera mu bitaro bya Polisi y’Igihugu ku Kacyiru.

Bazahabwa kandi amasomo ajyanye n’uburyo bwo kwandika inkuru no gufata amafoto, kurwanya ihohoterwa rishingiye ku gitsina (GBV) no kurwanya ibiyobyabwenge.

Aya masomo ni amwe mu yo Polisi itanga hagamijwe kongerera ubumenyi n’ubushobozi abapolisi bakuru, mu kazi kabo ka buri munsi mu gukumira ibyaha ku bufatanye n’abaturage.

CSP Sam Rumanzi, Umuyoboi w’Ishami rya Polisi rishinzwe Community Policing atangaza ko ayo masomo ari umwe mu mirongo Polisi yihaye mu gushyira imbaraga mu gukumira ibyaha bafatanyije n’abaturage.

Agira ati “Turifuza ko abaturage bagira uruhare rugaragara mu gukumira ibyaha binyuze mu gusangira amakuru hashakishwa kandi hakumirwa ibikorwa binyuranyije n’amategeko.”

[email protected]

Bamwe mu bapolisi bakuru bitabiriye amasomo y'ikarishyabwenge, mu gufatanya n'abaturage gucunga umutekano