Iri torero ry’Inkomezabigwi ryatangiye ku itariki ya 15 Mutarama 2017 rizamara icyumweru kimwe risozwe, kuwa 21 Mutarama 2017.

Umuyobozi w’Itorero ry’igihugu, Rucagu Boniface, yabwiye IGIHE ko byari biteganyijwe ko izi ntore zizatorezwa ku bigo 140, ariko bikaba bishobora kugabanuka kuko haje bake ugereranyije n’abagera ku bihumbi 68 bari bitezwe.

Yagize ati”Ubu abamaze kugera ku bihumbi 52 ariko twateganyaga ko hazaza abarenzeho. Uyu munsi ari wo wa nyuma wo kwakira abaza, bashobora kwiyongera.”

Rucagu avuga ko mu gihe cy’icyumweru bazigishwa indangagaciro na kirazira z’umuco nyarwanda, bizabafasha kugira umusingi uzatuma bubaka u Rwanda aho kurusenya.

Yagize ati” Kubaka u Rwanda rero bizahera ku kubaka ubunyarwanda, bakumva indangagaciro y’ubunyarwanda kurusha izindi zose bakiyumvamo ubunyarwanda […]. Ubunyarwanda butuma bubaka ubumwe bw’abanyarwanda, butanga amahoro atuma abantu bita ku miryango yabo bakayikorera, bakayiteza imbere bagateza n’imbere igihugu cyabo.”

Muri iri torero kandi, Inkomezabigwi zizasurwa n’abayobozi b’imidugudu, utugali n’imirenge baturukamo aho bazabaganiriza ku bikorwa bitandukanye by’iterambere bashobora kugiramo uruhare.

Nyuma y’itorero, ku itariki 30 Mutarama 2016, bazatangira Urugerero aho mu gihe cy’amezi atandatu bazakora ibikorwa rusange by’iterambere byiganjemo ibyo bazaba barashyize mu mihigo yabo.

Umuyobozi w’Itorero ry’igihugu, Rucagu Boniface