Ishuri Rikuru ryigisha imyuga n’ubumenyingiro mu Ntara y’Iburasirazuba (IPRC East), kuwa 06 Gashyantare 2015, ryatanze impamyabushobozi ku banyeshuri 231 barangije amasomo y’imyuga n’ubumenyingiro guhera muri 2012.

Aba banyeshuri bize ubukanishi bw’imodoka, amashanyarazi, gusudira n’ubwubatsi n’ikoranabuhanga (ICT ) ku buntu mu rwego rwo gufasha urubyiruko kwiteza imbere .

IPRC East itanga amasomo y’imyuga n’ubumenyingiro mu byiciro bitatatu aribyo ikiciro cy’ishuri rikuru (College of Technology ) gitangwamo amasomo yo ku rwego rwa kaminuza, ikiciro cy’ishuri ryisumbuye (Technical Secondary School ) n’amasomo y’igihe gito (Vocational Training ).

Abanyeshuri bahawe impamyabushobozi bose ni abo muri icy’amasomo y’igihe gito, bamwe bize umwaka umwe , abandi bize amezi atatu.

Umuyobozi wa IPRC East Dipl.-Eng. Ephrem Musonera (ibumoso) aha umwe mu banyeshuri impamyabushobozi

Umuyobozi wa IPRC East Dipl.-Eng. Ephrem Musonera yavuze ko mu gutanga ayo masomo y’imyuga ku buntu ikigambiriwe ni ugufasha urubyiruko kwihangira imirimo ndetse no gushyigikira gahunda y’igihugu yo guhanga imirimo igera ku 200,000 buri mwaka idashingiye ku buhinzi cyangwa ubworozi .

Musonera avuga ko amasomo y’imyuga yaragamije na none kwereka urubyiruko akamaro ko kwiga imyuga kugira ngo bahindure imyumvire, babishishikarize bagenzi babo .

Musonera yashishikarije abarangije kwiga imyuga kwibumbira mu makoperative kugirango bakore imishinga ifatika.

Yagize ati ’’ Mwige imishinga, mwishyire hamwe mu makoperative ibigo by’imari bibashyigikire , bityo ubutaha muzaba mutanga akazi kandi munadufasha gutanga ubutumwa bushishikariza abantu kwitabira imyuga ngo bahindure imyumvire. Bityo muzahindura ubuzima bwanyu n’ubw’abanyarwanda.’’

Ubutumwa bwo kwibumbira mu makoperative bwagarutsweho na Ngarambe Silver ushinzwe imiyoborere myiza mu Karere ka Ngoma wari waje uhagarariye meya.

Ngarambe yavuze ko ubumenyingiro uru rubyiruko rwavanye muri IPRC East ari cyo gishoro cya mbere kandi ngo bafite amahirwe yo gukorana n’ibigo by’imari nk’imirenge SACCO kugira ngo batangize imishinga ibabyarira inyungu .

Ngarambe kandi yavuze ko Akarere kari kubaka inzu izakorerwamo n’abanyamyuga , izo nzu zizwi nk’udukiriro , ngo ibyo bikazafasha abafite ubumenyingiro kububyaza umusaruro .

Mukanoheri Ernestine, umwe mu barangije amasomo mu bijyanye n’amashanyarazi , yavuze ko ubu yatangiye kubona ibiraka kuko ngo hari icyo aherutse gukora hamwe na bangezi be cyo gushyira amashanyarazi mu nzu, bahita babahembwa 50 000 frw.

Uretse aba barangije kwiga, IPRC East ifite abandi iri kwigisha ndetse n’abo iteganya kwigisha. Hari abanyeshuri 59 baziga umwaka umwe batangiye mu Ukuboza 2014, abandi bazatangira ku itariki ya 09/2/2015 baziga mu gihe cy’umwaka ibijyanye n’amahoteri, hakaba abandi 30 batangiye kwiga ibijyanye no gusudira bigira mu gihe cy’amezi atatu mu ishami rya IPRC East riri i Nyagatare.

Abanyeshuri barangije imyuga muri IPRC East ku buntu

[email protected]