Mu mwiherero w’urwego rw’ubutabera wabereye mu karere ka Rubavu mu kwezi gushize, hagaragajwe ikibazo cy’abagororwa basaga ibihumbi 31 bagombye gukurikiranwa barangize igihano cya TIG bakatiwe .

Abakatiwe TIG barangiza igihano cyabo

Mu gihe zimwe mu nzego zirimo n’urw’inkiko Gacaca zivuga ko abakatiwe gukora TIG ari 84 896 hari urundi rwego rwa leta rutatangajwe rwagaragaje ko ari 106 918.

Abari muri uyu mwiherero bavuze ko Mukantaganzwa Domitille wari ushinzwe inkiko Gacaca, asoza uwo murimo yavuze ko abakatiwe gukora TIG ari ibihumbi bisaga 80.

Haherewe ku bihumbi 80 byatangajwe na Mukantaganzwa, n’ibihumbi 53 366 bitabiriye ibi bihano, bigaragara ko abasaga ibihumbi 31 bangana na 37% by’abakatiwe icyo gihano, batigeze bagikora.

Iki gihano cyahawe abakoze Jenoside bo mu cyiciro cya kabiri bireze, bagatanga amakuru ku bijyanye n’uruhare rwabo muri Jenoside n’abayigizemo uruhare ndetse n’abo mu cyiciro cya gatatu. Cyatangiye mu mwaka wa 2005.

Minisitiri w’Umutekano mu gihugu Musa Fazil Harerimana yavuze ko inyandiko urwego rw’inkiko Gacaca rwashyikirije iyi Minisiteri ari rwo rwagendeweho abakatiwe TIG bafatwa.

Urwego rushinzwe abagororwa n’imfungwa, RCS rwagaragaje ko mu basaga ibihumbi 53 bitabiriye iyi mirimo, 2 126 batorotse mu gihe 352 bapfuye bagikora iyi mirimo.

Minisitiri Musa Fazil yerekanye ko muri uru rwego hakiri ibibazo ku bijyanye n’uko aba bagororwa batitabiriye iyi mirimo bafatwa.

Fazil ati “ Ikibazo ni uko abakatiwe TIG inyandiko yabo ntigere kuri RCS, n’uwayikora akayitanga ntawabafata ngo bajyanwe gukora TIG nta cyemezo cy’urukiko.”

Avuga ko hakenewe inyandiko z’abashakishwa, umwirondoro wabo n’icyemezo cy’urukiko cy’uko bakatiwe.

Ibibazo byasigaye bitarangijwe n’inkiko Gacaca bizakomereza mu nkiko z’ibanze.
Kugira ngo abatarakoze TIG bayikatiwe bakurikiranwe bisaba ko ibyemezo byazandikwa n’izo nkiko, pariki igasohora inyandiko yo kubafata.

Uretse ikibazo cy’abatarakoze TIG barayikatiwe, hagaragaye n’abayitoroka iyo bakora bava mu miryango yabo ku buryo hafi 80% batoroka bagafatwa nyuma.

Mu mwaka utaha, mu bagororwa 1937 bagizwe n’ abagabo 1778 n’abagore 160 barimo gukora iyi mirimo nta n’umwe uzaba ukiyikora. Muri bo 296 bazaba barangije iyi mirimo nsimburagifungo bayikoze mu mezi atatu.

Bimwe mu bibazo abakora TIG bahura nabyo byagombye kunozwa birimo kuba nta nzu zikomeye batuyemo ku buryo izo babamo zishobora kubateza ibibazo mu gihe cy’izuba n’imvura kuko zubatse na shitingi.

Kugeza ubu hari abadafite amarangizarubanza kandi n’abatarashyize mu bikorwa ibihano bakatiwe nta makuru ahari ngo bashakishwe , barakidegembya.

[email protected]