Iyi nyubako iherereye ku Kimihurura mu Mujyi wa Kigali igizwe n;ibice bibiri kimwe cyagenewe inama mpuzamahanga, na Hotel y’inyenyeri eshanu ifite ibyumba 292, icyumba cy’inama cyakira abantu basaga 2500, ibiro byo gukoreramo ndetse n’izindi serivisi zitandukanye.
Kigali Convention Centre niyo iheruka kwakira inama y’Umuryango wa Afurika Yunze Ubumwe yabaga ku nshuro ya 27 yahurije hamwe abakuru b’ibihugu by’Afurika 35, .
Byari kugora uwari we wese udafite inshingano zihariye kwinjira muri iyi hoteli mu gihe cy’inama yatangiye kuya 10 kugeza kuya 18 Nyakanga bitewe n’umutekano wari wakajijwe mu rwego rwo kurinda ubusugire bw’Abaperezida bari bamaze iminsi i Kigali.
Polisi y’u Rwanda nyuma yo gusohora itangazo rishimira imyitwarire yaranze Abanyarwanda mu gihe cy’iyi nama, ubu yashyizeho uburyo buboroheye bwo kuyisura.
Polisi y’Igihugu ifatanyije n’Umujyi wa Kigali bashyizeho uburyo abakeneye kugana Convention Centre guhera kuri uyu wa Kane, tariki ya 21/08/2016, bazajya bayinjiramo.
Imihanda abantu bashaka gusura Kigali Convention Center bazakoresha binjira:
Abafite imodoka, bazakoresha umuhanda uva ku masanganiro (Rondpoint)ya Minisiteri y’Ubutabera, MINIJUST bakomeze berekeza mu muhanda uca hagati ya MINIJUST na Convention Centre binjirire mu irembo ry’inyuma ya Convention Centre ari naryo bazakoresha basohoka bagasubira inyuma aho baturutse cyangwa bakagana mu muhanda wo mu Rugando werekeza kuri Lemigo Hotel.
Ku banyamaguru bo bashobora kugana Convention Centre baturutse ku muhanda uva ku Kabindi werekeza kuri Rondpoint isanzwe ya KBC, umuhanda uva Kacyiru uturutse kuri Rondpoint yo kuri NINZI HILL HOTEL hamwe n’umuhanda uturuka MINIJUST ugakomeza ugana kuri Rondpoint ya KBC.
Umuryango munini ubangikanye na Rondpoint isanzwe ya KBC, niwo uzakoreshwa n’abanyamaguru mu kwinjira no gusohoka.
Kigali Convention Center yatangiye kubakwa mu mwaka wa 2009, ikaba yaratwaye akayabo ka miliyoni 300 z’amadolari ya Amerika.
TANGA IGITEKEREZO