Iyi modoka irimo ibiro bikorwamo n’abapolisi bakira ibibazo by’abaturage, ibiri mu nshingano za polisi ikabikemura ariko ibirebana n’izindi nzego na byo bigashyikirizwa izo nzego zikabikemura

Ku itariki 4 Werurwe, hari hatahiwe abaturage bo mu Karere ka Ngororero, iyi ikaba ari inshuro ya gatandatu iyo modoka ikoze urwo ruzinduko dore ko yasuye Intara y’Uburasirazuba inshuro eshatu, Intara y’Amajyepfo inshuro imwe n’Intara y’Amajyaruguru inshuro imwe.

Kuri uwo munsi, abaturage basaga 100 baherewe serivisi zitandukanye na polisi hifashisijwe imodoka yabugenewe yifitemo ibiro; icyo gikorwa kikaba cyabereye mu Kagari ka Nyarusange, mu Murenge wa Nyange.

Ubwo bahageraga bahasanze inzego z’ubuyobozi, harimo ushinzwe imiyoborere myiza mu Karere ka Ngororero, Umunyamabanga Nshingwabikorwa w’Umurenge wa Nyange n’uw’Akagari ka Nyarusange hamwe n’umukozi w’ikiciro kigize rumwe mu nzego z’ubutabera kizwi ku izina rya Maison d’accès à la Justice (MAJ).

Iki gikorwa cyitabiriwe n’abaturage benshi ugereranije n’ibyakibanjirije kandi bishimiye cyane serivisi baherewe muri ubu bwoko bw’ibiro kuri uwo munsi.

Umwe muri bo witwa Murayirage Sylvanie, ufite imyaka 43, wakemuriwe ikibazo yari afitanye na se cyari gishingiye ku mutungo, yagize ati "Polisi yamvuye amaguru. Iyi gahunda ni nziza cyane".

Undi witwa Nduwayezu Anicet yagize ati," Ntako Polisi idakora ngo itwegereze serivisi."

Umuvugizi wa Polisi y’u Rwanda mu Ntara y’Uburengerazuba, Supt. Emmanuel Hitayezu, yagize ati "Iyi gahunda igamije kwegereza serivisi abaturage, cyane cyane abatuye kure ya sitasiyo za Polisi."

Polisi y’u Rwanda ifite bene izi modoka eshatu zikoreshwa muri iyi gahunda mu duce dutandukanye tw’igihugu.

Supt. Hitayezu yakanguriye abaturage kujya bitabira iki gikorwa no kuba ijisho ry’umuturanyi kugira ngo barusheho kurwanya no gukumira ibyaha kandi bakihutira gutanga amakuru ku kintu cyose gishobora gutera umutekano muke.

RNP