Isozwa ry’ayo masomo ryahuriranye no gusoza andi mahugurwa y’ibindi byiciro bibiri by’Abofisiye ba Polisi y’u Rwanda 60 bahuguriwe muri iri shuri mu gihe cy’amezi ane; bakaba barahawe ubumenyi mu bijyanye n’ibyo bashinzwe.

Ayo masomo n’ayo mahugurwa byashojwe ku mugaragaro na Minisitiri w’Ubutabera akaba n’Intumwa Nkuru ya Leta, Johnston Busingye.

Amasomo abo Bofisiye Bakuru bagize icyiciro cya gatanu bize kimwe n’ibindi byakibanjirije yibanze ku buryo bwo kuyobora abandi bapolisi, gukumira amakimbirane no kwimakaza umuco w’amahoro; bakaba barabiherewe Impamyabumenyi y’Icyiciro cya gatatu cya Kaminuza itangwa na Kaminuza y’u Rwanda.

Mu butumwa yagejeje ku bitabiriye ibyo birori, Minisitiri Busingye yagize ati,″Isozwa ry’amasomo y’Abofisiye Bakuru ba Polisi barimo n’ab’u Rwanda ndetse n’isozwa ry’amahugurwa y’ibyiciro bibiri by’abandi bofisiye b’u Rwanda ni intambwe Polisi y’u Rwanda iteye mu kubaka ubushobozi bwayo butuma isohoza inshingano zayo zo kubungabunga umutekano w’abantu n’ibyabo; haba mu gihugu, mu karere U Rwanda ruherereyemo ndetse no hanze yako.″

Yakomeje agira ati,″Goverinoma y’u Rwanda n’Abanyarwanda bazi neza kurusha undi wese ko kubahiriza amategeko ari inkingi ya mwamba y’iterambere rirambye. Iyo kandi abashinzwe kuyubahiriza bafite ubumenyi buhagije, barangwa n’imyitwarire ya kinyamwuga igihugu kigira umutekano usesuye.″

Minisitiri Busingye yagize kandi ati″Uko Ikoranabuhanga rirushaho gutera imbere, ni ko bamwe baryifashisha gukora ibyaha by’uburyo butandukanye birimo ibyambukiranya imipaka. Kubirwanya bisaba ubuhanga n’ubumenyi buhambaye; ariko na none bisaba ubufatanye hagati y’inzego zibishinzwe binyuze mu guhanahana amakuru n’ubushake bw’Ubuyobozi bw’Ibihugu."

Yabwiye kandi abari aho ati,"Iterambere ry’isi rijyana n’ubwiyongere bw’ibyaha.Inzego z’umutekano zigomba guhora zihugura kugira ngo zibashe kubikumira no kubirwanya; kandi amahugurwa nk’aya ni cyo amaze.″

Minisitiri w’Ubutabera akaba n’Intumwa Nkuru ya Leta yabwiye Abofisiye bashoje amasomo n’amahugurwa ati, ″Ndahamya ndashidikanya ko igihe mwamaze mwigishwa wabaye umwanya mwiza wo gusangira ubunararibonye; kandi ubumenyi mwungutse muzabusangize bagenzi banyu.″

Yasoje ashima Abafatanyabikorwa bagize uruhare mu kugira ngo ayo mahugurwa akorwe nk’uko byateganyijwe.

Abofisiye bahize abandi mu masomo mu byiciro bitandukanye bahawe ibihembo.

Ubwo yagezaga ijambo ku bitabiriye ibirori byo gusoza ayo masomo n’amahugurwa, Umuyobozi w’Ishuri Rikuru rya Polisi y’u Rwanda, Commissioner of Police (CP) Felix Namuhoranye yababwiye ko ibihugu Abofisiye Bakuru ba Polisi bagize icyiciro cya gatanu bashoje amasomo baturukamo ari Ethiopia, Kenya, Malawi, Namibia, Sierra Leone, Somalia, Sudan, South Sudan, Uganda n’U Rwanda.

CP Namuhoranye yagize ati,″Icyo aya masomo n’amahugurwa bigamije ni ukongerera ubumenyi aba Bofisiye kugira ngo barusheho kuba Abanyamwuga; bityo basohoze inshingano zabo neza. Mu gukora ibi byose hakurikizwa umurongo mugari w’Ubuyobozi bw’Igihugu cyacu.″

Yasabye Abofisiye bashoje amasomo n’amahugurwa gushyira mu bikorwa ibyo bize ku nyungu z’igihugu n’abagituye.

Umunyamabanga wa Leta ushinzwe Itegeko Nshinga n’andi mategeko, Evode Uwizeyimana ashyikiriza igihembo CP Felix Namuhoranye

SP Oliver Mukantabana wo muri RCS na we yahawe igihembo

Johnston Busingye ashyikiriza igihembo SSP Dr. Oreste Tuganeyezu, umunyeshuri witwaye neza kurusha abandi

Minisitiri w’Ubutabera, Johnston Busingye ashimira CP Moses Kafeero waturutse muri Uganda wahize abandi mu masomo