Ubuyobozi bw’Akarere ka Gasabo buratangaza ko hari amakosa akomeye yagaragaye mu gutanga ibyangombwa byo kubaka, ababikoze bakazakurikiranwa bakanabihanirwa byanze bikunze.

Mu minsi yashize ubuyobozi bw’aka Karere bwafashe umwanzuro ko ibyangombwa byo kubaka byahawe abaturage guhera tariki ya 1 Mutarama 2012 kugeza ku byatanzwe ku ya 31 Ukuboza 2014 biteshejwe agaciro.

Abaturage basabwe gusubira ku Karere bagasaba ibyo byangombwa bundi bushya.

Mu kiganiro umuyobozi w’aka Karere Stephen Rwamurangwa yagiranye n’abanyamakuru, yatangaje ko hari amakosa akomeye yakozwe mu gutanga ibi byangombwa, kandi ko atazihanganirwa (ayo makosa).

Stephen Rwamurangwa Umuyobozi w'Akarere ka Gasabo avuga ko uwatanze ibyangombwa mu buriganya azakurikiranwa (Ifoto:Imvaho Nshya)

Yavuze ko hari abaturage babonye ibi byangombwa baciye mu nzira zitari zo, abafashe porogaramu yakoreshwaga bakayikoresha mu manyanga yo kubinjiza mu bafashe ibyangombwa mbere mu buryo bwemewe n’Amategeko n’ibindi.

Ati “Gusubiramo ibyangombwa byatanzwe muri iki gihe ni uko dufite amakuru ko hari abashobora kuba barabonye ibyangombwa mu gihe iriya software (porogaramu) yari itaratangira gukora, hari n’abandi babibonye muri icyo gihe bakanyura mu nzira zitari zo, ababibafashamo bakabishyira inyuma guhera mu mwaka wa 2012 kugira ngo nyine bimere nk’ibigiye kuri gahunda, wenda barubatse badafite ibyangombwa.”

Rwamurangwa yanashimangiye ko ababikoze bazahanwa, ati “Amategeko arahari ni cyo amara, uwo bizagaragara ko yatanze ibyangombwa mu buryo butemewe n’amategeko , birahanirwa kandi hari amategeko abihana.”

Yongeyeho ati “Ntibivuze ko ahantu hose abantu babonye ibyangombwa wenda bitanyuze mu biro by’ubutaka wenda babibonye ku ruhande.”

Abaturage barasabwa gutanga amakuru y’uburyo babonye ibyo byangombwa yirinda ibibazo byamukururukaho, bagasaba kongera kubihabwa bundi bushya, igikorwa ngo kitarenza umunsi umwe ngo abe ahawe igisubizo.

Ati “Icyo twirindaga ni uko hari abakozi bamwe bagiye bava no mu kazi bagaragaraho imikorere itari myiza hanyuma wenda bakaba bagitanga ibyo byangombwa mu buryo tutaramenya, ariko byaratangiye turimo gutunganya dosiye zose zijyanye n’ibyangombwa turimo gutanga ubu n’ibyo turimo gukosora, ku buryo dufite icyizere ko bitazasubira.”

Ibyo byangombwa byatahuweho uburiganya byatanzwe kuva mu 2012, Willy Ndizeye ari we Uyoboye Gasabo

Akarere kandi ngo kiteguye gufasha abantu bazagura ubutwari bakaza bakagaragaza ko babonye ibyangombwa wenda bashutswe n’abakozi, cyane ko ari bo bashinzwe kubaha serivisi, ati “yaza akaduha ayo makuru kandi tukamufasha n’ubundi kuko ntacyo bitwaye, nta gitangaza yaza agasaba nk’uko abandi basaba ibyangombwa byo kubaka.”

Rwamurangwa yakomeje avuga ko akarere nta muturage kagamije ko ahungabanira muri ibi bikorwa, ko ahubwo ikigamijwe ari ugukosora, kuko uko byagemze kose nta muturage wabigizemo uruhare.

Ati “... ariko na none nk’ubuyobozi turirinda ko ejo hazavuka akajagari gatunguranye kandi hari ibyo twaketse, ndetse n’ibyo twagiye tubona wenda bitari byo, tukumva rero icya ngombwa ari uko turengera inyungu z’abaturage duhagarariye.”

Tubibutse ko iki cyemezo cyo guhagarika ibyemezo byo kubaka cyafashwe nyuma y’iminsi mike Stephen Rwamurangwa atirewe ubuyobozi bw’Akarere ka Gasabo, asimbura Willy Ndizeye weguye kuri uwo mwanya hamwe n’abari bamwungirije bonbi.

[email protected]