Mu gihe hasigaye iminsi ibarirwa ku ntoki ngo hatangire isuzuma ry’imihigo uturere twahize, tariki ya 8 Nyakanga 2015, umuyobozi w’Umujyi wa Kigali Fidel Ndayisaba, abayobozi batandukanye b’Akarere ka Gasabo hamwe n’abaturage batuye mu Murenge wa Remera, batashye inzu y’igorofa izakoreramo umurenge hamwe n’Akagari ka Rukiri ya kabiri, uyu akaba ari umuhigo wahizwe n’ako Karere mu mwaka w’imigiho wa 2014-2015.

Umuyobozi w’Umujyi wa Kigali Fidele Ndayisaba yavuze ko iyi nyubako ari ishema ku batuye Umujyi wa Kigali.

Inzu y'agaciro ka Miliyoni 300

Yagize ati “Umurenge wa Remera wibohoye gukorera mu nyubako itajyanye n’igihe, ndetse n’akagari kibohoye kuko byajyaga bigorana kugatandukanya n’utubari turi hano.”

Akaba yakomeje asaba abayobozi n’abakozi b’uyu murenge, kuzatanga serivisi nziza zisa n’inyubako bagiye gukoreramo, aboneraho n’umwanya wo guhwitura abayobozi b’uturere hamwe n’imirenge bahiga imihigo yo kubaka ibiro byo gukoreramo ariko ntibahigure ku gihe.

Hari icyizere ko imihigo 86 Akarere ka Gasabo kahize yose yasezwa 100%

Umuyobozi w’Akarere ka Gasabo Rwamurangwa Stephen, yavuze ko iyi nyubako ari mu ntambwe nyinshi bamaze gutera bagana ku kwesa imihigo bahize mu rwego rw’akarere, ibi bikaba bibaha ikizere ko uyu mwaka bashobora kuzaza mu ba mbere mu kwesa imigiho.

Yagize ati “Uyu ni umuhigo uri mu nkingi y’imiyoborere myiza, ariko hari n’indi mihigo twahize tumaze kwesa irimo amashuri, imihanda, amazu y’abatishoboye n’indi itandukanye. Ukoze impuzandengo y’imihigo yose twahize tugeze kuri 90%.”

Akomeza avuga ko muri uyu mwaka w’imihigo wa 2014-2015, ngo n’ubwo bari mu ruhando rw’utundi turere bapiganwa, bafite icyizere cy’uko bashobora kuzaza mu myanya y’imbere.

[email protected]